..... I'm the poem that's  yours but doesn't belong to you ever,...ඔබට අයිති,ඔබ ළඟ නැති එකම කවිය මම

Monday, August 22, 2011

෴ ලියන්නියකගේ ප්‍රේමය හෙවත් Pouring My Heart out on Paper ෴(පළමු කොටස )

දුහිවිලි පිරුණ , අත් ඇදි කැඩී ගිය හාන්සි පුටුවේ ඔත්  ඇය , මදක් හතිලන්නට වූවාය. ඇය කාමරය සිසාරා නැවතත් නෙත් හෙළුයේ , දීර්ඝ සුසුමක් වාතලයට මුසු කළාය.


එවිටම වාගේ , කාමරයේ දොර රෙද්ද අතරින් පාත් වූ කටහඩක් , ඇගේ දුර ඈත ගොස් සිටි සිත කැදවා ගෙන එන්නට සමත් විය.

“ අම්මා , මම යනවා නෙත්මිගෙ ගෙදර , දවස් කිහිපයකට එන්න වෙන එකක් නැහැ. මම රෝස ආන්ටිටයි , ලහිරු ටයි කීවා මේ පැත්ත පොඩ්ඩක් බලන්න කියලා. ම් ම් ම් . . . . පොඩි නංගි රෑට එනවා කීවා . මං යනවා අම්මා “

“ බුදු සරණයි “

බුදු සරණ ගොස්, වැසී ගිය දොර රෙද්දේ වැදී බිම වැටෙනු ඇය බලා සිටියේ උපේක්ෂා සහගත සිතිනි. බුදු සරණ දෙනෙතින් ඔසවා ගත් ඇය , ලොකු පුතු ගේ පසු පසින් යන ලෙස අණ දී එවදන් සුළඟට යළිත් මිමිණුවාය.

“ බුදු සරණයි පුතා.පරිස්සමින් “

සැර දමා පණ ගැන්වුන වාහනයේ දුමින් , නැවතත් ඒ වදන් වැසී යන්නට ඇති ද?

ඇය නැවතත් දුහුවිලි පිරි කාමරය දෙස බැලුවේ , අද රාත්‍රියට පෙර මෙය පිරිසිදු කර අවසන් කරන්නේ කෙසේ ද යන්න ගැන සිතමිනි....... උදවුවට හෝ කුලියට යමෙකු ගෙන්වා ගෙන , කාමරය පිරිසිදු කර ගන්නට ඇය කැමැති නැත. තමාගේ දෑතින්ම පිළිවලක් වෙන කාමරයක , ඔහු සැතපෙනු දැකීම ඇගේ සතුටයි.

ඒ නැතත් , පැරණී මතක ගබඩාවක් වන් වූ මේ අඳුරු දුහුවිලි පිරි කාමරයෙන් ඇයට හමුවන නූල් කැබැල්ලක් පවා ඇගේ සිතට ගෙන එන මතක චිත්‍ර විදීම ට , ඒවායේ ගැටී මොහොතක් තනි වෙන්නට ඇයට ඇති වුවමනාව බලවත් ය.

වෙනකෙකු මෙය අස්පරස් කළා නම් , තමාට මහමෙරක් තරම් වටිනා ඇතැම් දේ කුණු කූඩයට යන්නේ අනෙකාට එය නිකම්ම නිකම් කුණු කසල බිඳක් වීම නිසාය.එබැවින් ඇය වෙහෙස නොබලා යළිත් වැඩට බැස්සාය. පැරණි ඇඳ යටට ඇය නැමී බැලුවේ . ඇදන් යට අනිවාර්යෙන් රඳවා ඇති පැරණි පොත් පෙට්ටි කිහිපය හදිසියේම වාගේ සිහි වූ බැවිනි. . . . .

ඇදන් යට පොත් පෙට්ටි , හෝ වෙනයම් දේ රදවා තැබීම නුසුදුසු බව ඇය ඉගෙන ගත්තේ ඇය කුඩා අවධියේ දී තම මවගෙනි. වැඩැහිටි වී , විවාපත් වී , දරුවන් වදා , ඔවුන් හදා , දීගදුන් පසු ද ඇය තම මවගේ එම කීම අකුරටම ඉටු කළද . වසා දැමූ කාමරයක ඇති ඇදක් යට කුමක් තිබ්බත් අවැඩක් සිදු නොවේ.


බැඳී තිබු මකුළු දැල් කඩා දැමූ ඇය , මදක් කිවිසුම් අරින්නටවත් , කහින්නටවත් ඉසුඹුවක් ලබැ නොගත්තේ , සියල්ල සිරවූ දෑසින් කඳුළු පනින්නට විය. නමුත් , මුවේ රැඳි මන්දස්මිතයත් , නෙතේ පහළ වූ දීප්තියත් නිසා , අඳුරු කාමරය සැනකින් එළිය වන්නට විය.

හොඳින් නො වසන ලද පොත් පෙට්ටි කිහිපයක් ඇඳයට තිබෙනු , කැඩී ගිය මකුළු දැල් අතරින් ඇය දුටුවාය.ඉන් ආසන්නතම පොත් පෙට්ටිය තමා වෙතට ඇද ගත් ඇය , එතනම වාඩි වූයේ , රිදුම් දෙන දණිස් කටු දෙක දිග හරිමින් , විදාහල පා ඇද යටට යොමු වන පරිදිය.

පොඩි දැරියකට ලැබුන , රසවත් රසකැවිලි පාර්සලයක් ලිහා බලන්නියක සිහිකරමින් , ඇය පොත් පෙට්ටිය වෙත තම වෙවුලන දෑත් ළංකළේ , එය තුල ඇතැයි , සිතෙනා විටත් සිතට සුවයක්ම ගෙනෙන දෑ , ඒ තුල ඇති දැයි බැලීමටයි. . . .

ඉන් ඇය ඉතාම ප්‍රවේශමෙන් , බිදෙන වීදුරු බදුනක් සේ , පළමුව එළියට ගත් පොත දුහුවිලි බැදී , පොතකැයි කීමට බැරි තරමින් අබලන් වී තිබුනු දුටු ඇය , අලුත උපන් බිළිඳියක පිසදමන්නාක් මෙන් පරිස්සමින් එහි බැදී ඇති දුහුවිලි යවන්නට විය. ටිකින් ටික දුහුවිල්ල ඉවත් වී පොතේ කවරය මතු වන විට , එහි දර්ශකය මෙන් , ඇගේ වත ද ටිකින් ටික එළිය වැටී දිලිසෙන්නට විය.

" For Your Eyes Only "

කවරයේ හැඩැති රවුම් අකුරින් ලියා ඇති , මාතෘකාව මතුවෙත්ම , ඇගේ දෑසින් ගිලිහුන කඳුළක් , මාතෘකාවේ , Only හි O අකුර මත පතිතවනවාත් සමඟම , වේගයෙන් පැමිණි වාහනයක කණ් බිහිරි කරවන නලා හඩ ඇසෙන්නට වූයේ , එදා මෙන්ම අදත් , නිදහසේ කඳුළක් සැලීමට ඇයට ඇති අයිතිය උදුරා ගනිමිනි.

මකුළු දැල් , දුහුවිලි අතරේ , මිය ගිය සිත සොයන
මම
෴ සොඳුරු සිත ෴


විශේෂ ස්තූතිය :- රවි අයියා ට.. . . . . .

Sunday, August 21, 2011

෴ නුග රුක නුඹයි ෴


නුග රුක නුඹයි - සිතකට සෙවනක් දුන්න
නොම යා නොදී - වෙනතක මා සිත දුන්න
සෙවනට වෙලා ඉන්නට - මා පෙම් බැන් ද
අද නුඹ කොහිද - සෙවනක් නැහැ මට ඉන්න


තව බොහො රුක් ඇතත් - සෙවනට ගෙන්වන්න
නැහැ නුඹ වගේ - සිසිලක් එහි මට දෙන්න
ගිනි ගන්නා ගතට සුවයක් වී ඉන්න
අය ගෙන් පලක් නැහැ සිත නැත්තම් දෙන්න

සිත යදිනවා නැවතත් නුඹ දැක ගන්න
සිහිනය දිගේ සෙවනක් වී වත් එන්න
නුග රුක මුලින් කපලා පොළවේ දැම්ම
අයගෙන් මිදී මා සිත නුඹ පැළවෙන්න






මහ ගහක් වුනත් , බොන්සායි කරල පැළ කර ගන්න පුළුවන් නම්, ඇයි ඔයාට බැරි මගේ හිතේ පැළ වෙච්චි , මහ නුග ගහක් වෙන්න. ආදරයෙන් පිරුණ හිතක , පැළ වෙන්න එන්න.


නුග සෙවන නැතිව , ගිනියම් අව්වේ දැවෙන සිත
මම
෴ සොඳුරු සිත ෴

Thursday, August 18, 2011

෴ දෙබස ( එයයි , මමයි වගේ තමයි )෴




රතු සුදු ලා දම් කහ නිල් රන්

වටකුරු දිගැටි සිහින් හතරැස්
නටු කොට දිග නටු අග පිපි මල්
මෙහැමතුරින් නුඹ සෙවූ මල මම්

පෙති වැඩි සුවඳැති රෝස කුසුම්
සෙවු ඔබ ඇයි මං ළඟ නැවතුම්
සමණළ වෙස් අරගත් දෙඹරුන්
රෝස කුසුම් ළඟමයි නැවතුම්

මධු සුවඳින් සිත මත් වීලා
රුව පැහැයෙන් ගත හිරි වැටිලා
ලස්සන මල් වෙතටම බැඳිලා
දුක් ගඟුලේ උන්නෙමි ගිලිලා

දුක දැනුනම තටු කඳුළින් පෙඟිලා
හදවත සැමතැන කටු ඇනිලා
වතුසුදු මල ළඟටම ඇදිලා
ආදරයෙන් තටු පිරිමැදිලා

මලකින් මලකට පිය මැනලා
නොදැනම නුඹ ළඟටම ඇදිලා
සුවඳ පැහැය නැතිවට දැනිලා
සිත පුරවන් නුඹ ඇත රැදිලා







 
Click to get cool Animations for your MySpace profile



වතුසුදු මල
මම
෴ සොසී ෴

Picture by :- Saliya Wijesinghe

Wednesday, August 17, 2011

෴ සුබ උපන් දිනයක් ෴



අද දින උපන් දිනය යෙදී ඇති , නොදුටු බ්ලොග් මිතුරාට, සුබම සුබ උපන් දිනයකට ආසිරි

සඳ වට තරු මල් පිරිවර සේමා
නුඹ වට පිරිවර නිති ඇති වේවා
කැඳල්ල උතුරන උණුසුම සේමා
දූ දරු සෙනෙහස උණුසුම ‍දේවා

නිල් දිය  , කතරට සිසිල සේමා
බිරිඳ නුඹේ හද සැනසුම වේවා
පෙති අග පිනි බිඳු හිරු දුටු සේමා
නෙත අග කඳුළෑලි නිති දුරු වේවා

හද තුල සහනය , සතුටම රඳවා
දුක් දොම්නස තනී කම දුරු වේවා
නිරෝගි සවි බල සුව සෙත රදවා
මගෙ ආයුත් ගෙන නුඹ වැජඹේවා

I hope all your birthday dreams and wishes come true.


නුඹට සුබම සුබ උපන් දිනයක් පතන
මම
෴ සොඳුරු සිත ෴

Tuesday, August 16, 2011

෴ නුඹට අයිති නූඹ ළඟ නැති එකම කවිය මම ෴... I am the poem that's yours but doesn't belong to you ever,...

බොහොම කලකට පෙර ලියවුන කවියක්...... ආයෙත් පළ කරන්න හිතුනා. . . .

නෙළුම් පතක රැදි දිලිසෙන දිය බින්දුව...........මම
                          උදේම නුඹ ඇස ගැටෙනා පිනි බින්දුව................මම
                          නිරුදක මහ වැලි කතරට වැහි බින්දුව...............මම
                          ඉඳහිට නුඹෙ නෙතින් ගලන කඳුළු බිදයි............මම


                          වියළි කතරෙ නුඹේ පයට සිහිල් පලස............... මම
                          නුඹ දවනා හිරු එළියේ වලාකුළයි....................... මම
                          මහ වැසි මැද උණුසුම දෙන සිතුවිල්ලයි.......... මම
                          උණුසුම් සැඩ හිරු කිරණේ සීත සුළඟ................ මම


                           අමාවකට පායා ආ පහන් තරුව............................ මම
                           අහම්බයෙන් ඇස ගැටෙනා දිය කිඳුරිය............ මම
                           ගිරිදුරු මහ වන අරණේ හිස පිපි මල..................මම
                           නුඹේ සිතේ නාදුනනා පහන් හැඟුම......................මම


                           නුඹට හිතැති නමුත් දුරැති මිරිඟු සයුර.............. මම
                           නුඹත් දන්න මමත් දන්න එකම රහස...................මම
                           නුඹත් නොදැන දෙතොල ඇඳෙන සිහින් සිනා මම
                           නුඹට අයිති නුඹ ළඟ නැති එකම කවිය..............මම


“Poetry is thoughts that breathe, and words that burn.”

" As Long as you are HAPPY I can breath " 


නුඹටත් හොරෙන් නුඹේ කවි අතර සැගව ගිය
මම
෴ සොසී ෴

Monday, August 15, 2011

෴ බලා(පොරොත්තුව) ෴


කඳුළු බින්ඳු එකතු කරල හැදුව මාල පළදවන්න
සුසුම සුසුම එකතු කරල වියූ සළුව පළදවන්න
බොහෝ දුරක් යැවූ සිතට සිසිල  සුවය එක් කරන්න
කවදා දෝ නුඹ එන්නේ මසිත ඔටුනු පළදවන්න

නොදැක හිටපු බව නොහැඟේ
සිහින පුරා සරපු නිසා
සුවඳ නුඹේ මතක ඇතේ
සිහිනෙන් මා සිඹීන නිසා


දැකපු සිහින හෙලි කරන්න
මා අන්සතු බව කියන්න
වරදින් මා මුදා ගන්න
එක පාරක් ඇවිත් යන්න


මඟ බලන
මම
෴ සොසී ෴

Sunday, August 14, 2011

෴ කැළෑ හඳ (කෙටි ම කෙටි කතාවක් ) ෴

“ අර බලන්න “

පන්සල් ගොස් එමින් සිටි ඔහු ඈත පෙනෙන පුන් සඳ පෙන්වයි. වැහි වළාවකින් සඳ තරමක් වැසී තිබුනත්, දීප්තියෙහි අඩුවක් නම් නැත. ඕනෑවට එපාවට එසෙද බැලූ මා , යළිත් බිම බලාන පිය මනින්නට වූයෙමි.මාර්ග පහන් එළියෙන් ආලෝකමත් වූ මඟෙහි කෙළවරට අපි ආසන්නවී සිටියෙමු.


සඳ නොමැති දින වලට , රාත්‍රියේ , මේ මඟ යෑම ඉතාම දුෂ්කර වන්නේ වීදි ලාම්පු එළියක් නොමැති බැවිනි. වීදි ලාම්පු ලබා දෙන ලෙස අයදිමින් , ආයාචනා කරමින් ඉන් පසුව අණ කරමින් , බිය වද්දමින් ප්‍රාදේශිය සභාවට ලියූ ලිපි වලට ලද පිළිතුරක් නම් නැත.


වීදී පහන් නොමැති පාළු මාවතට පිවිසි පසු , සඳ එළිය  යට වූයේ ඔහුත් මාත් පමණි. අත වූ විදුලි පන්දම දැල්වීමට මා නොකැමති වූයේ , සඳ එළියට එයින් වන නිගරුවට නොකමැති වූ නිසා වෙනි.

අද හවස් යාමයේ ඔහුත් මාත් තදින් බහින් බස් වූයේ , පෝය දවසේ මගේ අම්මාව බැලීමට යාමට ඒමට ඔහු ට නොහැකි වු නිසාය. හෙට දිනට බාර දිය යුතු වැඩක් , නිම කිරීමට ඔහුගේ මුළු දහවල් කාලයම ගත විය. සියළු වැඩ අවසන් වු පසුව යි ඔහුට මා මතකයට ආවේ.

“ කෙල්ල , ලබන තිස් වෙනි ද මට නිවාඩු , අපි යමු එදාට අම්මව බලන්න “

මා ළඟට විත් නොයෙක් උසුළු විසිළු කර , මගේ අවධානය දිනාගත නොහැකි ව , අවසානයේ ඔහු පැවසීය.

“ කෙල්ලෙ , අපි පන්සල් යමු, අද පෝය දවසෙ , මෙහෙ ම තරහ වෙලා ඉන්න හොඳ නැහැ. , ඔය තරහ නිවෙන්නත් එක්ක පන්සල් යමු “

මගේ නොඉවසිලි ,කැළඹුන සිතට ද , යම් සැනසීමක් අවැසිව තිබුන හෙයින් පන්සල් ගමන ට මා සහභාගී වූ නුමුදු , ඔහු හා පැවැති සිත් නොහොඳකම නැති වුනේ නැත.අම්මා අද මුළු දවසම මා වෙනුවෙන් පේවී බලා සිටින්නට ඇත.

වීදි පහන් නොමැති මාවතේ දී සඳ එළියේ ඔහු මා තදින් සිප ගන්නවාත් , මා ඔහු ව වැරෙන් තල්ලු කරනවාත් මගේ මතකයට එන්නේ , විටින් විට ඇවිත් යන මතක තීරුවෙ වූ එකම තද බල මතකය ලෙස පමණි. .. . .

ජනෙල් කූරු අතරින් අදද පේන ඒ හඳට මම වෛර කරමි.ජනෙල් පඩිය උඩට නැඟගත් මම , හැකි වෙර යොදා හඳට කුණුහරුපයෙන් බැන්නෙමි.

“ මිසී මිසී , මෙ ලෙඩාට අමාරුයි ,“

තුන් හතර දෙනෙක් පැමිණ වදෙන් පොරෙන් මා ජනෙල් පඩියෙන් කුදලා ගන්නවාත්, තකහනියෙන් පැමිණිනු බොහොම කඩවසම් වෛද්‍යවරයා , සිහින් වේදනාවක් දෙමින් දකුණතට යමක් විදිනවාත් සමඟම , මගේ පෙම්බරා සමඟ යළිත් වතාවක් විදී පහන් නොමැති අඳුරු මාවතේ තනි වුනෙමි.....

ප්‍රාදේශිය සභාවෙන් තවමත් විදී පහන් සාදා නොතිබුන අතර , පුන් පෝ දවස වුවත් සඳද පායා නොතිබුනි. මගේ පෙම්බරා පමණක් එළිය දෙමින් මා අසළම . . .............

අහස පුරවන   පෝය දවසට
පායලා ඝන දුර කපා
මං බලා ඉමි නුඹෙ දිහා
දෙනෙත නිදි නැති රැය පුරා

අරුම දුටුවෙමි දිනක්
පුර පෝ දිනක
නැත නුඹ දිලිසෙනා

ගිනි ගතිමි සිත
නුඹ කොහෝ දෝ
දෙනෙත ඇත බිය එක් වෙලා

කොතෙක් තරු මල් යාය තිබුනත්
මගේ නමටම ලියවිලා
සඳ නොමැති ලොව
නැතේ සුවයක්
වරෙන් විහඟින් පායලා

අමාවක දී මගේ දිවියට
නුඹ කොහේ දෝ සැඟවිලා
පුර පෝය වී යළිත් කෙදිනක
නුඹ ඒවිදෝ සුවඳක් වෙලා



එක පුංචිම පුංචි නිමේෂයකින් , ජීවිත කිහිපයක් වෙනස් වෙන හැටි.

පුන් පෝය දවසෙ , හඳ දකින්න අකමැති
මම
෴ සොසී ෴


ප/ලි :- ඔහු හා ගමන් යනෙන සෑම විටක දීම මෙන්නම , එදින ද ඔහු, මා මහා මාර්ගය තීරුවෙන් එපිටට කර එක්කන් ගිය අතර, ඔහු සෑම විටම මෙන්නම මා ආරක්ෂා කරමින් මහා මාර්ගය දෙසට වන තීරුවේ ගමන් කළේය.

“ එක පාරටම කවුද පාරට පැන්නා , වාහනය පාලනය කරන්න තරම් වෙලාවක් තිබ්බෙ නැහැ “ රථයේ රියදුරු පවසා ඇත.

Thursday, August 11, 2011

෴ කේන්දරය / The Horoscope(අවසාන කොටස ) ෴

කේන්දරය එක කොටසට
කේන්දරය දෙක කොටසට

සිත හදා ගත් මා බොහෝ වීරිය ගෙන කතාවට මූලාරම්භයක් සොයනු වස් , අපේ අතීතයේ මඟ දමා ආ සලකුණු ඔස්සේ මං සොයා ගත්තෙමි.


“ ඔහෙට මතකෙයි , ඔහෙයි මායි මූණ ගැහුන ඉස්සොරෝම දවස ? “

ප්‍රශ්ණය අසා , ලැබෙන පිළිතුරු ඇසීමට මෙන්ම දැකීමට ද රිසි වූ මම , පපුවේ හිස තියාගත් වනම , දෑස් පමණක් ඔසවා ඔහු දෙස බෑලුවෙමි. වදනින් නොදෙඩූ දහසක් සිත්තම් රැසක් , ඔහුගේ දෙනෙත් වල බොර පැහැය පහ කර දිස්නය රැගෙන එන ගමන්ම , හීනී තෝල් සඟල විකසිත කරමින් පිපෙන්නට විය.

“ මට මොකදෑ අමතක ? හෙහ් හෙහ් “

ඔහු හඬ නඟා සිනාසෙන විට රිද්මයට සැලෙනා පපුවට වී මාද සිනා සුනෙමි. හැබැහින්ම ඒ හමුවීම ඒතරම්ම මිහිරි හාස්‍යෙයන් පිරුණ මතකයක්ම විය.

“ එදා මයෙ මැණිකෙ , තව ඩිංගිත්තෙන් , කෝච්චි පෙට්ටියේ හිටපු  සෙනඟ දම්මල, මට ගස්සවල තමයි නවතින්නේ “

අහඹු ලෙස සිදු වූ පුංචි පැටලැවිල්ලක් දුර දිග ගොස් ඇරඹි ,ඔහුගේත් මගේත් පෙම් කතාව , කෝචිච් ගමන තව තවත් රසවත් කළේය.කෝච්චියේ නම ගිය දඩබ්බරියක වූ මගේ , අහිංසක සොඳුරු පෙම්වතා වූයේ ඔහුයි.

“හරි පුදුමයි මයෙ මැණිකෙ. . .  “

“ ඇයි ? “

“ මැණිකෙ වගේ දඩබ්බර , මුරණ්ඩු , ආඩම්බර කෙල්ලකට මම කැමැති වුනේ ඇයි කියල ,අදටත් මට හිතා ගන්න බැහැ. මගේ සිහින කුමාරිය වෙලා හිටියෙ අහිංසක කෙල්ලක් . . .  “

“ ඇයි මං හොඳ නැද්ද ? “

මා ඇසුවේ , ඔහුගේ පපුවේ වූ දිගම රෝම ගස ඇඟිලි තුඩඟ දවටා ඔහුට රිදෙන්නට පපුවෙන් ගැලවීමට උත්සාහ දරමිනි. මා ඒ මොහොතේ පසු වූයේ දීග ගෙන දරුවකු සිටි මේරු අම්මා කෙනෙක් ගේ භූමිකාවෙන් බොහෝ දුරස්ව , ඔහුගේ පෙම්වතිය බවට පත්වෙමිනි.

“ හෙහ් හෙහ් , මැණිකෙ මාව කසාද බැන්ඳට පස්සෙ , ඩිංගිත්තක් සංසුන් වුනාට, පේන විදිහට තවමත් ලොකු වෙනසක් වෙලා නැහැ වගේ , එහෙම තමයි මැණිකෙ , සංසාරේ පතාන එන දේවල් , දැන් බලන්න , මගේ හිතේ මැණිකෙ ගැන තිබ්බ දෙගිඩියාව අයින් කරල ,මැණිකෙ මගේම කර ගන්න මට පුළුවන් වුනේ , කේන්දර බැලුවට පස්සෙ නෙව. කමකට නැති මුරණ්ඩු එකියක් කියල, මැණිකෙව මම අයින් කළා නම් හෙම , අද මේ ගමට ම රජා වගේ ඉන්න පොඩි මහත්තයෙක් නැහැ “
ඔහුගේ ඒ වදන්  වලින් මා ඔහුට පැවසීමට යන විශාල රහස හෙළිකළ යුතු බව නැවතත් මට මතක් කර දුන්නේය.විගසින් ඔහු ගේ හෘද සාක්ෂියේ උණුසුමින් මෑත් වූ මා , ඔහුගේ දෙනෙත් දෙස සෘජුවම බලා සිටියෙමි.

“ මොක ද මේ ? “

ක්ෂණික ප්‍රතිචාරයෙන් පුදුම වූ ඔහු මවිතයට පත්විය.

“ මහත්තයා , ඔහේ ඔය මහ ලොකුවට හිතාන ඉන්න , යසෝදරා දේවිගෙ වගේ කේන්දරය ,  . . . . .  . .  ඒක බොරු එකක් “

“ මොනව  ! ! ! නිකම් විහිළු . . .“

“ නැහැ  . . විහිළු නෙමේ “

ඔහුගේ දෑස් කාන්තරයක අතරමං වූ මඟියෙකු මෙන් , පාර අසමින් මගේ දෑස් වල කිමිදෙනු මට දැනුනි. ඔහුගේ දෑසින් , මගේ දෑස් ඉවතට නොගත් මා , කතාවේ ඉතිරි කොටස ද හැකි ඉක්මනින් දොඩා අවසන් කිරිමට සැරසුනෙමි.

“ ඔයා හරි අමුතු කෙනෙක් , ඔයාට මම ආදරය කරපු තරමට , මට ඕනි වුනේ නැහැ ඔහේව නැති කර ගන්න. ඒත් ඔහෙ දන්නෙ නැහැ.මගෙ කේන්දරයට සීහෙන කේන්දර හොයන්න ගිහින් මයෙ අම්මල වැටිල හිටියෙ ලොකු අමාරුවක. අනිත් අතට , උඩරැටියෙක් වුන ඔයා, සෑහෙන කේන්දර විස්වාස කරාන හිටියා. මම ඔහෙගෙ කේන්දරයත් අරන් කාටත් රහසින් මගේ කේන්දරයත් එක්ක පොරොන්දම් ගලපන්න අරන් ගියා. ඒ මනුස්සය කේන්දර දෙක අතට ගත්ත ගමන්ම කීව දෙයින් මගෙ හිත හිරිවැටිල ගියා “

ඔහුගේ ශරීරයේ ගිනි රස්නය දරා ගත නොහැකි වූ මා, කතාව මදකට නවතා , ඔහු සමීපයෙන් නැගී වුන්නෙමි. දැන් ඔහු සයනයේ පා පහතට හෙලා වාඩි වී සිටි , චූදිතයා වූ මම ඔහු ඉදිරියේ සිට ගෙන ය. නමුත් නෙත් රැහැන නොබිදී පවති.

“ ඒ මෝඩ , උද්දච්ච නාකි මනුස්සය , මගේ ජීවිතේම ගිනි තිබ්බ වචන ටික කීවේ , හරියට මම උපන්න කොට මගේ ඉරණම ලියල උන්දැට බාර දීල තිබ්බ වගේ. බුදු නෝනෙ , මේ කේන්දර පාහන්න තියා , හිතන්නවත් එපා. එක්කො උන්දෑ නෝනෙව දාලා යනවා. නැත්තම් නෝනෙගෙ ජීවිතෙ නැති වෙනවා. දරු පල ගැන නම් හිතන්නවත් බැහැ .කියලා උන්දෑ මට කීවා “

“ මයෙ මැණිකෙ මොනව ද මේ  “

“ ඔවු. . . . . . . ඉතිරි ටිකත් අහගන්න. මට ඔහෙව නැති කර ගන්න ඕනි වුනේ නැහැ. මැරුණත් මැරෙන්නෙ මං , දරුවෙක් නම් අරන් හරි හදාගන්න පුලුවන් , ඔහෙ මාව දාලා ගියත් , දවසක් හරි ඔහෙගෙ සෙවනට වෙලා ඉන්න මට ඕනි වුනා. . .  ඊට පස්සෙ  . . . . “


“ ඔවු ඊට පස්සෙ මොක ද වුනේ ? “

“ ඊට පස්සෙ මං , ඔහෙගෙ කේන්දරේට හොඳ හැටි පෑහෙන අලුත්ම කේන්දරයක් මා වෙනුවෙන් හදව ගත්තා. . . . මම මගේ ඉරණම , ඒ කොටු දොළහෙ මගේම අතින් ලීවා “


කතාව අවසානයේ මා ඔහුව මගේ නෙත් රැහැනින් මිදෙව්වෙමි. විසල් යුගල් සයනය දෙසට යොමු කළ මා දෙනෙත් එයින් මුදවා ගත් මා , කාමරයේ ජනේලය ට පිටතින් පෙනෙන ඉද්ද මල් ගස දෙස බලා සිටියෙමි.වහා යමක් සිහි වූ මා මට පිටුපසින් සිටින ඔහු දෙස හැරී බැලුවෙමි.

“ පුතා  . . . . . පුතා . . . . . අනේ පුතේ “

මගේ ආදරණිය සැමියා , විසල් යුගල් සයනයේ , දිගා වී සිටියේ ,  මින් ස්වල්ප වේලාකට පෙර මා සුවය ලැබූ ඒ උණුසුම් පපුවේ වම් පසට තබා ගත් ඔහුගේ දකූණතත් , වේදනාවෙන් මිරිකෙන මුහුණත් , මා දෙසට ම යොමු වූ කඳුළින් දිලිසෙන දෙනෙතත් සමඟිනි. . . . . .
ගිලන් රථයේ , ඔහුගේ ළඟින්ම සිටින
මම
෴ සොඳුරු සිත ෴

සමහර කාරණා තියෙනවා, කවදාවත් හෙළි නොකළ යුතු. . . . . එහෙම හිතෙනව ද ඔයාලටත්. . . . .?
"Truth is beautiful, without doubt; but so are lies."

Wednesday, August 10, 2011

෴ කේන්දරය / The Horoscope 02 ෴


කේන්දරය පළමු කොටසට

රාත්‍රී කෑම මේසය අප තිදෙනාගේම සිත් අප්‍රසන්න හැඟීම් රැසකින් පිරවීමට සමත් විය. කෑම මේසයේ දී , පුතා විසින් නැවතත් අමිලා සම්බන්ධව කතාව ඇද ගත් අතර අප්පච්චිත් , පුතුත් විරසකව කෑම මේසයෙන් නැගිට ගියේ ඔවුන් පමණක් නොව මාද කුසගින්නේම තබමිනි.

ඉතා රසට පිළියල වී  උණු උණු වේ මේසයට විත් තිබූ බත් සහ ව්‍යාංජන පසු දින උදයේ පිළුණු වී තිබුනේ පුතුගේත් , අප්පච්චිගේත් සිත් ද පිළිණු කරමින් ය. ඔහුටත් මටත් දාව දරුවන් ඇත්තේ එකකි. එය ද ඉතාම කල් ගොස් පිළිසිඳ ගත් බීජයකි. ඉතාම වටිනා සම්පතක් ලෙස පපුවෙ හොවා හදාවඩා ගත් ඒ අනගි වස්තුවත් , එය උපන් පසු රජෙකු වූ , ඒ බීජයේ හිමිකරුවාත් මෙසේ නාදුනන්නන් මෙන් විරසක වී සිටිනු , ම සිතට දරා ගත නොහැකි වේදනාවකි.කෑම මේසය අස්කරන ගමන් මම දැඩි තීරණකට එළඹීයෙමි.
පුතුගේ ,අප්පච්චීගේ කාමරයට ගිය මම . . . . .
“ මහත්තයා මට ඔයයි පුතයි එක්ක කතා කරන්න ඕනි “
“ මැණිකේ , අමිලා ගැන නොවෙන්න , වෙන ඕනි දෙයක් කතා කරන්න මං ලෑස්ති , . . . . වැඩකට නැති කතා වලට මට වෙලාවක් නැහැ.මම මගේ තීරණය දීලා ඉවරයි. ආයෙ ඒක දෙයියො බුදුන් ඇවිත් කීවත් වෙනස් වෙන්නෙ නැහැ මැණිකේ “
ඔහු කාමරයෙන් එළීයට ගෙන්වා ගැනීම අපහසු බව දැනුන කළ , මම සීරුවෙන් ගොස් ඔහු නිදන ඇදේ පා කෙළවර වාඩි වුනෙමි. මටත් හොරා දීර්ඝ සුසුමක් ම‍ගේ ‍පෙනහළු පුරවා නික්මුණේ , මා කීමට යන කාරණයේ ඇති බරපතලකම ම‍ගේ සිහියට නැඟුන හෙයිනි.
“ මහත්තයා , . . . . .  මම මේ කියන්න යන කාරණාවේ බරපතලකම මට තේරෙනවා.. . . . . . .ඒත් . . . .  ඔහෙල දෙන්න මේ විදිහට දෙපැත්තට වෙලා ඉන්නව මට ඉවසාන ඉන්න බැරිම තැනයි මම මේ කියන්නේ “
“ හ්ම් “
“ ඉස්සෙල්ලම මට සමාවෙන්න මහත්තයා , පුළුවන් නම් මට සමාව දෙන්න “
ඔහු එවර හිස කෙළින් කර ම‘දෙස බැලූවේ , විශ්මය ඇද ගත් දෙනෙතිනි.ම‍ගේ  දෙනෙතේ ගුලි වී තිබූ කඳුළු කැට , දෑසට බර වැඩි වූ‍යේ , ඔහුගේ බැල්මෙන් සලිතව , මගේ කම්මුල්  දිගේ රූටා යන උණුසුම මට දැනුනේත් ,ඔහුගේ වතේ අනුකම්පාවක සේයාවක් ඇඳුනේත් එක්වරමය.
වහා කද කෙලින් කර ඇද විට්ටමට වාරු දී , ඔහු සැරසුනේ මා කීමට යන කතාවේ ගැඹුර දැනගෙන මෙන්ය.

ඔහු ගේ පා පාමුල වුන් මා ඔහු වෙත ඇදී ගොස් , ඔහුගේ පපුවේ හිස හොවා ගත්තෙමි. ඔහුගේ පපුවේ උණුසුම දැනෙත්ම ,ම‘සිත මදකට සංසුන් වුව ද , ඔහුගේ පපුවේ ගැස්ම දැනෙත්ම ම‘සිත වරදකාරී හැඟීමෙන් පිරී ඉතිරී යන්නට විය. මා හිස  සිඹි ඔහු , කුඩා දරුවකු සෙනෙහසින් තුරුළු කර ගන්නාක් මෙන් මා තව තවත් දැඩිව ඔහුගේ පපුවට තුරුළු කර ගත්තේ ‍නව ‍යොවුන් ‍පෙම්ව‍තෙකු තම ‍පෙම්වතිය කුළුදු‍ලේම තම හදවතට තුරුළු කර ගන්නා තරම් ‍සෙ‍නෙහසකිනි.

“ මොකක් ද මැණිකෙ , මුව පැටියෙක් වගේ බයෙන් ගැහෙන්නෙ මොක ද? හරියට මට දැනෙන්නේ මැණීකෙ මගෙ පපුවට තුරුල් කර ගත්ත පල වෙනි දවසෙ වගේමයි. . . . . “

ඒ වචන් ඇසුනු සැනින් මා සිත හඬා වැටෙන්නට වූ අතර, කාරණාව කෙතරම් බරපතල වුව ද , ඔහු හමුවේ සියල්ල වමරා දමා ම‘සිත නිදහස් කර ගැනීමේ උවමනාව , පුතුගේ පෙම් පලහිලවුවට ත් වඩා දැඩි සේ දැනෙන්නට විය.


පපුතුරේ හිස හොවා ,
සිසිල් කඳුළැලි සලා,
සමාදෙනු හිමි මගේ,
වරද මා අත තමා

ඔහු පළල් උර මඩලේ සිටින , මහා වරදකාරිය
මම
෴ සොඳුරු සිත ෴

Monday, August 8, 2011

෴ කේන්දරය / The Horoscope (01)෴

“ අප්පච්චිට කීවට තේරුම් ගන්නෙ නැත්තෙ ඇයි අම්මේ ? මේ කාලේ මොන කේන්දර ද ? අමිලා මට කැමති නම් මම අමිල ට කැමැති නම් එච්චර නේද ? අනික කේන්දර ගැලපිලා කසාද බැදපු වුන් වෙන් වෙලා නැද්ද ? “

“ ඔවු ලොක්කො , මට තේරෙනවා. ඒත් අප්පච්චිට ? “

“ අම්මා කියල බලන්නකො අම්මා. මට නම් වෙන කෙල්ලො හොයන්න තියා ගන්න එපා කියල අප්පච්චිට කියන්න “

අප්පච්චි සහ ලොකු පුතා දැන් ටික දවසක සිට විරසක වී සිටිති. ලොකු පුතා පෙමින් වෙලි සිටින ගැහැණු ළමයාගේත් , ලොකු පුතාගේත් කේන්දර නොගැලපීම මෙයට මූලික හේතුව වී ඇත. මගේ ස්වාමි පුරුෂයා කේන්දර ඉතා තදින් විශ්වාස කරන්නෙකු වීම ගැටළුව තව තවත් බරපත කර ඇත.

ඔහු හා මා විවාහ වූ පසුව , ඔහුගේ සිත තුල වූ කේන්දර සම්බන්ධ විශ්වාසය තව තවත් වැඩි දියුණු වී ඔහුගේ සිතේ මුල් බැස ගත්තේ නුග ගසක් පොළව බදා වැළඳ ගන්නා තරමේ ශක්තියකිනි. එය උදුරා දැමීම කිසිසේත්ම පහසුවෙන් කළ හැකි කටයුත්තක් නොවීය.

ඔහු හා මා විවාහ වුනේ ,මනා ලෙස ගැලපුන කේන්දර සමඟිනි. ඉතාම වාසනාවන්ත වූ ඒ කේන්දර ගැලපීම , සසර පුරා පතාන එන යසෝදරා සහ සිදුහත් කුමාරයාගේ කේන්දර පෑහීම මෙන් වූ බව ජ්‍යෝතිශ්‍යෙව්දීන් කිහිපපොළක්ම පවසා ඇත්තේ , මගේ ස්වාමි පුරුෂයා ප්‍රසිද්ධ ජ්‍යෝතිශ්‍යෙව්දීන් කිහිපපොළක් ළඟටම මේ කේන්දර උස්සන් යෑම නිසාය. ජ්‍යෝතිශ්‍යෙව්දීන් කේන්දර දෙක ගලපා කරන අතිශෝක්ති කතාවන් අසා සිටීමට ඔහු ඉතා ප්‍රිය කරයි.ඔහුහට උඩ ගෙඩි දීමට ඔහු වටා සිටි සියල්ලන්ම සැදී පැහැදී සිටීම ඔහුගේ ඔදවැඩි සිත තව තවත් ඔසවා තබන්නට සමත් විය.

“ පොඩි මහත්තයා , මේ මැණිකෙ කැන්දන් ආවත් හරි පොඩි මහත්තයට බලාන ඉන්දිදි හරි ගියේ “

“ පහතරැටි ගෑණු එහෙම තමයි. ආපු ගෙදරකට වරදින්නෙ නැහැ. උත්සාහවන්තී. “

“ මැණිකෙ ආවට පස්සෙ පොඩි මහත්තයාගේ වතු පිටි වල පැල ඉනි බලන් ඉද්දි විශාල වුනා. ගෑණිගේ වාසනාව “

මා කැන්දන් ආ පසු ගම්මුන්ගේ මුවින් මුව පැතිරී ගිය මෙවැනි කතා , කණින් කොණින් මගේ ස්වාමියාගේ සවන් වැකීමත් , කේන්දර පෑහීමත් , කිරි පැණි සේ දිවි ගෙවීමත් ඔහුගේ සිත අමන්නානන්දයෙන් පිරවීය.

“ මයෙ මැණිකෙ තමයි මට වාසනාව ගෙනාවේ. මයෙ මැණිකෙයි මායි සංසාරෙ පුරා පතාන එන්න ඇති මැණික “

ඔහු ඉතා ආදරයෙන් මාහට පැවසූ වාර ගණන මෙතෙකැයි කිව නොහැක. ඔහු මා හට පෑ ආදරය ද ඉතාමත් ගෞරවණිය ආදරයක් ම විය. කිසිවක් කිසිවිටක මාගෙන් නොවිමසා ඔහු කළේ නැත. මට එය විටෙක ඉතා වෙහෙසකර , සිතට වදයක් සහ අනවශ්‍ය බර පැටවීමක් විය.

සෑම දෙයකටම පාහේ මාගේ අදහස් විමසා කටයුතු කල ඔහු , ඔහුගේත් මගේත් ලෙයින් උපන් ලොකු පුතාගේ විවාහයේ දී මාගේ වදන් ඇසීමට පමණක් නොව , ඒ ගැන කතා කිරීම ද ප්‍රතික්ශේප කරයි.

“ මැණිකේ , ඒ ළමයගේ කේන්දරේ කණවැන්දුම් යෝගයක් තියේ , තව මොකක් ද අර විෂ කන්‍යා යෝගයත් තියේ. මැණිකෙ කියන්නෙ ඒ දේවල් දැන දැනත් මයෙ කොලුව ඒ මරු කටට යවන්න කියල ද ? “

එවදන් අසන මා සිතින් පටන් ගන්නා සීතඅඳුරු කළු වලාවන් , මගේ හිසත් දෙපතුලක් දක්වා දිව ගොස් මුළු ශරීරයම ක්ෂණයෙන් සීත කර හකුලුවා දමයි. නමුදු මා තවමත් සිටින්නේ ම‘පුතු ගේ මතයේමය . එයට හේතු කාරණා රැසක් මා සතුවී පවතී. . . . . .කතාව අවසන් නැත. ඇරඹුනා පමණි. . .විෂ කන්‍යා යෝගය සහිත ලේලියක ගෙට ගෙන්වා ගැනීමට මා මෙතරම් කැමැති කුමක් නිසා දැයි යන්න කතාව අවසානයේ නුඹලා දැන ගනු ඇත.
 
කේන්දර විශ්වාස නොකරන
මම
෴ සොඳුරු සිත ෴

Saturday, August 6, 2011

෴ මගේ කවිය හොරු අරන් / My Pilfered Poem ෴


කවි පොත පිරිලා කවි උඩ කවි ලියද්දිත් ,
පොතක ලීව නැති එකමෙක
ලස්සන කවියක්
,
මගේ ළඟම මාත් එක්කම හිටියා
.
ඒ කවි පද අකුරින් ලියන්න හදන හැමවාරෙකම
,
කවුරු හරි ඒ කවිය දකියි කියල,
ආපහු හදවතේම හංඟ ගත්තා

ඒත්

අද මට හදිසියේම ඒ කවිය ලියන්න හිතුනා
දෙවියනේ ! ! !
හිතේම තියන් ඉඳල
ඒ කවියේ එක අකුරක්වත් මතකෙට එන්නෙ නැහැ
“ මගේ කවිය හොරු අරන් “ ද
හිතේම තිබිල , හිතටම දිය වෙලා ද


---- ------ ------- ------ ----- ---- -----

සඳ තරු මල් මේ සැමට හොරෙන්
කළුවර අඳුරේ මට ද හොරෙන්
අකුරින් අකුරට ගලපා ලීවෙමි
මම ද නොදන්නා එක කවියක්

කිසිදින , කිසිවකු දකියි කියා
සැම විට රහසෙම කවිය ලියා
මා කියවා නොබැලූ ,  මා හදවත තැවරූ
එකමෙක කවියක් නැති වී ලා
කවිය ගෙනත් දෙනු මැන සොයලා
---- ------ ------- ------ ----- ---- -----

හොයල ගෙනත් දුන්නත් , අඳුර ගන්න පුළුවන් වෙයි ද කියලා මට සැකයි. . . .



නොලියූ කවිය ගැන තැවෙන
මම
෴ සොඳුරු සිත ෴

Friday, August 5, 2011

෴ මගේ සකිසඳ / My Best Friend ෴

“ මොකද නංගි අද හිතේ අමාරුවෙන් වගේ “


සෝබර වත නොදැක , දුක පිරුණ හඬ ද නොඅසාම , යතුරු පුවරුවේ ඇඟිලි වැදී එහා ඉමෙන් මතුවන අකුරු සහ වචන වල රටාවෙන් ඔහු මගේ සිත කියවන අපූරුව මා සිතට ගෙන එන්නේ , සංතෝෂය මුසු කුතුහලයකි.

“ ගණන් ගන්න එපා නංගි , මිනිස්සු ඔහොම තමයි. Let them go “

අන්අය මෙන් නොව , ඔහු මා සිත අස්වැසීමට යැයි කියා වන පොත් කෙරු බණ පද කියන්නේ නැත.නමුදු ම‘සිත පෙළන දුක , කඳුළක ද පසුව සිහින් සිනා පොඳක ද නංවා පලවා හරින්නට ඔහු තරම් රුසියෙක් නැත.

ඇතැම් විටක ඔහු වැන්නෙකු මගේ මිතුරකු වූ බවට ආඩම්බරයෙන් ඉපිලී යාමට මට සිතේ.

“ සොසී ට ඉන්නේ බුදු ෆිට් යාළුවෙක් නේ , මටත් ආසයි එහෙම යාළුවො ඉන්නව නම් “

එවිට මා සිත මගේ සදාදරණිය මිතුරා ගැන ආඩම්බරයෙන් පිරී යාම වරදක් ද?

ඇතැම් විටන ම‘සිතට දුකක් ගෙන එන්නේ , ඔහු මා ගැන සොයා බලන තරමට , මට ඔහු ගැන සොයා බැලීමට වත්, ඔහුට උපකාර කිරීමටවත් නොහැකි වීම නිසාය. ඔහුට ඇත්තේ මා මෙන් මූලික අවධියේ ගැටළු නොවීම ඊට හේතුව වන්නට ඇත. එහෙත් ඔහු , ඔහුගේ ජීවිතය දෙස බලන උපේක්ෂා සහගත ආකාරය ද ම‘සිතට ගෙන එන්නේ පුදුමයකි.

අන්අයගේ සිත් තුල ඊර්ශ්‍යා වඩන තරමේ යහළු මිතුදමකින් බැඳුන මගේ සකිසඳ. මේ පුංචි සටහන ඔබට උපහාරයක් ම වේවා.

දිවි අඹර ඝන අඳුර දුරු කරන් පායා
කවි අතර මනහරම කවි පදය වූවා
සවි බලය දී සිසිල නුග ගසක් සේමා
නුඹ මගේ සකිසඳව සිත් අරනෙ පිපුනා

දුක් කඳුළු ‍ගෙන පැමිණ යන අයත් බෝමා
නෙත් පිසින නුඹෙ වදන් හැමදාම වුන්නා
අත් කරන් සෝ සුසුම හිස බිමට නැමෙනා
සැම විටම උරහිසක් වී නුඹම සිටියා

දිවි කතර නුඹෙ සෙවන සිසිලසක් වන්නයි
නුඹෙ සුසුම සිත නිවන මෘදු පවන වන්නයි
ලොව දිනන විට නිබඳ නුඹ ළඟම ඉන්නයි
සකි සඳේ නුඹ නමට ලොවම නැලවෙන්නයි

සමහර විටක , ඔහු දන්නෙත් නැතිව ඇති , ඔහු ගෙ සෙවන මට මේ තරම්ම සුවයක් කියල.


ප/ලි

කවදාවත් තමන්ගේ හොඳම යාළුවට ආදරය කරල , ලෝකෙ ඉන්න හොඳම යාළුවෙක්ව තමන්ට අහිමි කර ගන්න එපා. ආදරය ඒ තරම්ම භයානකයි. . . .

ලෝකේ ඉන්න හොඳම යාළුවගේ , යෙහෙළිය
මම
෴ සොසී ෴

Wednesday, August 3, 2011

෴ මත විමසුමට මඟ - ඔබේ සිතත් මේ පස්දෙනා අතර ද ? ෴

අපි කවුරුත් යම් සිද්ධියක් දිහා බලද්දි ,  අපිටත් නොදැනීම අපිව හෙවත් මා තුල ඉන්න මම ඒ සිද්ධිදාමයේ ඉන්න පුද්ගලයෙක්ට හෝ කිහිපදෙනෙක්ට නොදැනීම ආරෝපණය වෙනව....ඊට පස්සෙ අපි තීන්දු තීරණ ගන්නේ ඒ තුල ඉන්න “මම“ ට සාපේක්ෂව හිතල. ඒත් මම පැත්තකින් තියල , ඒ සිද්ධිය දිහා ස්වාධීනව බලන්න අපි කී දෙනක්ට පුලුවන් ද?


මේ පුංචි ඇරයුම , ඒ වගේ කතාවක චරිත ටික පෙළ ගස්සවන්නයි.  මෙන්න මේ ලින්ක් එකේ තියන චරිත පහේ කතාවේ ඉන්න එක චරිතයක් තුල හරි තමන්ගේ හිත නතර වෙනව ද කියල බලල , ඒ චරිත පහ ගැන තීන්දුවක් දෙන්න කියලා ආරාධනා කරනවා.


මම මේ චරිත පහ අතරින් “ බීටල් “ කියන යහළුවාගේ චරිතය නරකම කෙනා විදිහට තෝරන්න හේතු වුන කාරණා ව තමයි , යහළුවෙක් විදිහට මට යමෙකුට කරන්න පුලුවන් උදවුවක් නොකර සිටීම නිසා මේ සිද්දිය සම්බන්ධයෙන් මගේ සිතේ ඇතිවන දැඩි කණගාටුව. ඒ කණගාටුව උපරිම නිසා මම බීටල් කියන චරිතය නරකම චරිතය කරනවා.

ලේසි නැහැ හැබැයි. මුළු කතාවම කියවන්නත් වෙයි. ඔබේ කාලය අගේ කරනවා. දිගට කියවන්න අකමැති කෙනෙක් නොගියට කමක් නැහැ..... ඒත් මං නම් කියන්නේ ගිහින් බලන්න , තීන්දුව ඔබට බාරයි.

මෙන්න පාර ......... චරිත පහක්

යාළු ෆිට් එකට උදවු කළා කියල හිතන්න එපා බීටල් . . . අවසානයේ දඬුවම දෙන්න වෙන්නෙ ඔයාටමයි.ඔයානේ කතාවේ ප්‍රධාන චරිතය.....
මම
෴සොසී ( සොඳුරු සිත ෴

Tuesday, August 2, 2011

෴ සොසී තවමත් මඟ බලන් ෴


නිල්ල නිලට අතු සැලෙන වෙලාවේ
අත් අල්ලන් යන්නට හැන්දෑවේ
රාස්සිගේ රතු අවුව යටින්
කොළ වේලුන බුමුතුරුණ මතින්
නුඹ එන්නෙ නැහැ දැන්
කරුණු නොදන්නිය මං


කඳුළු බිඳක් නෙත තෙමන වෙලාවේ
පුරුදු සුවඳ සිත සිඹින වෙලාවේ
නොදැන පිපුන මල් වියන මතින්
වියලුණ සිත් විල් මඩල තෙමන්
නුඹ ආයෙත් එයි නම්
මං මෙතනම ඉන්නම්



I'll let  you go
I'll set you free
&
when you've seen what you need to see
when you find you , come back o me.

Take your time , I won't go anywhere
picture you with the wind in your hair
I'll keep your things right where you left them
I'll be here for you
( David Cook: Come Back to Me Lyrics )

මම
සොසී

Blogroll

Related Posts Plugin for WordPress, Blogger...