..... I am the poem that's  yours but doesn't belong to you ever,...

Tuesday, June 29, 2010

෴ හඳුනා ගන්න ඒ ඔහු / ඇය විය හැකියි ෴


ජීවිත කාලයේ දී හැමදාම අපිට කීදෙනෙක් නම් මුණ ගැහෙනවද? කීදෙනෙක් එක්ක හිනා වෙනවද කතා කරනවද... 
එයින් කී දෙනෙක් මතකයේ රැදෙනවද.... කී දෙනෙක් ජිවිතෙට සම්බන්ධ වෙනවද.. කී ‍දෙනෙක් අපව හැර යනවද... 
එයිනුත් කී දෙනෙක් මරණ මංචකයේදිත් දකින්න පෙරුම් පුරනවද......

පිස්සු වගෙයි ද.... නැහැ එහෙම නැත්තම් තමයි පිස්සු හැදෙන්නේ..... 

ලෝකේ කොච්චර මිනිසුන් හිටියත්, අපි ළඟ රැදෙන්නෙ ,එයිනුත් අපිව තේරුම් ගන්නේ, එක්කනයි නැත්තම් දෙන්නයි. ඒත් අපි හරිම මෝඩයි. අපේ ඒ මෝඩකම නිසා, ඒ එක්කෙනා හරි දෙන්න හරි අපේම වරදින් අපි නැති කර ගන්නව.

සමහර කෙනෙක් ඉන්නව ,රූපයෙන් ,තරාතිරමෙන්, රැකියාවෙන් ,සමාජ තත්ත්වයෙන් ,වයසින් ,පාටින් ,පවුල් පසුබිමෙන් තමන්ට නොගැලපුනත් තමන්ව තේරුම් අරන් එකට ජීවත් වෙන්න නම් කියාපු කෙනා.ඒත් සමාජයේ මුල් බැස ගත් ආකල්ප වලට මුහුණ දෙන්න තියෙන බිය නිසාත් බාහිර වටිනාකම් වලට වැඩි තැනක් දීමට සිත ගන්නා උත්සාහය නිසාත් තමන්ට වඩාත්ම ගැලපෙන කෙනාව අපි අහිමි කර ගන්නව.

ඒත් ,පසු කාලීනව අපිට මුණ ගැහෙන අය අතර අර අපි කලින් අතහැරල දැම්ම වගේ අය මුණ ගැහෙන්නෙ නැති වෙන්න පුලුවන්. 

තනියෙන් සිටින කොට දැනෙන තනිකමට වඩා ,ගොඩක් දරා ගන්න අමාරු තනිකමක් තමයි විවාහය තුල කෙනෙක් තනි වෙන එක... ගැහැණු පිරිමි දෙපාර්ශවයම එහෙමයි...බාහිර වටිනාකම් වලට එක දුන්නම හිත් වලින් තනි වෙන එක වලක්වන්න අමාරුයි. මොකද බාහිර වටිනාකම් වල සැබෑ ස්වරූපය අපිට දවසක වැටහෙන නිසා... අපි පහු වෙලා හරි අපිව තේරුම් ගන්න පුලුවන් හිතට ලන් වෙන්න පුලුවන් අය සොයනව..... 

මම දැකල තියෙනව සල්ලි බාගෙ ,යාන වාහන ,විතරක් නෙමෙයි හරිම ලස්සන ගැහැණුන්ව බැදල ඉන්න පිරිමි පවා ආදරය සොයමින් අඬන හැටි. මෙතනදි ආදරය කීවේ රාගය නෙමෙයි. රාගය ගන්න යන්න පුලුවන් තැන් තියෙනව නේ.... තමන්ව තේරැම් ගන්න ,තමන්ව අදුන ගන්න, තමන් කියන දේ අහන් ඉන්න පුලුවන් ,තමන්ට වටිනාකමක් දෙන්න පුලුවන් කෙනෙක්ව හොයනව.

ඉතින් ..බාහිර වටිනාකම් වලට මුල් තැන දෙන්නෙ නැතිව බොහොම පුංචි හාදුවක් එක්ක ගොඩක් ආදරේ ලබන්න තියෙන අවස්ථාව අහිමි කර ගෙන අතර මඟදි හිස් වෙන ආදරයක් ලබන්න ඔබ කැමති වෙන එකක් නැහැ කියල මම හිතනව....
A successful marriage requires falling in love many times, always with the same person.

 එවන් වූ ආදරයක් අබියස සිටින 
මම
෴වත්෴

Monday, June 28, 2010

෴ මඟ නොමඟ ෴




මල් පාවඩ ඇතිරී ඇති පාමුලට
මාවත විවර වී ඇත මා ඉදිරි පිට
නුඹ මගෙ දකුණු පස උණූසුම දැනෙයි මට
ආශිර්වාද කඳුළැලි කෝ සවන් වට

ආදරයම ජීවිතයයි සිතුන විට
නුඹටම මුවා වී සෙනෙහස  යදින විට
 ලෝකය දෙපස සිට මා අත් අදින විට
මිය ගොස් නැවත එන්නද මා ලොවින් පිට

ජීවිතයට සෙනෙහස මිස කුමන බස
 තේරුම් ගන්න හැකිවෙද වෙන වයන තත
 ලෝකය නොවෙයි අගනා නුඹේ සොඳුරු වත
හිමි වන දිනේ කවදා නම් වෙයිද රස


ජීවිතේම ආදරෙන් ඉන්න කියල හිතන් හිත ගිය කෙනත් එක්ක හැමදේම දාලා යන්න වුනොත්......................................

හා හා කලබල වෙන්න එපා. ආශිර්වාද නැතිව යන ගමනින් වැඩක් නැතිලු. ඒත් ආශිර්වාද අරන් යන්න වෙන්නේ ,හිත බැඳුනෙ නැති කෙනෙක් එක්ක නම්.

මේකට නියම උත්තරයක් මගේ හොඳම යාළුව කීව .ආදරේ කරල විවාහ වෙන්න එපා. විවාහ වෙලා ආදරේ කරන්න .ඉතින් මොනාද ඔයාල ඒ ගැන හිතන්නේ.

විවාහ වෙන්න හිත හිත නාකි වෙන
මම
෴වත්෴

Sunday, June 27, 2010

෴ ගැහැණු සිතේ ඉඩක් ගන්න ඕන ද෴

This Post is Dedicated to My Sweetheart .....
  ආදර ලකුණු පුවරුව කියන ලිපියට ආව ඉල්ලීමක් ඉටු කරන්නයි යන්නේ . ඒ පොතේම 65 වෙනි පිටුව....එහෙනම් ඔන්න බලන්නකෝ ඒ පිටුවෙ තියෙන දේවල් කොයි තරම් සත්‍ය ද නැද්ද කියල.....

  1. බාධා නොකර ඇය කියන දෙයට සවන් දෙන්න.
( ගොඩක් පිරිමි අය එහෙමයි කියල මම හිතනව. ඒත් අපි කියවල කියවල ඉවර වෙලා ,මේ මම කීව දේවල් ඇහුනද කියල ඇහුවම තමයි එයාල පියවි සිහියට එන්නේ.... අහන් ඉන්නව වගේ ඉන්නව විතරයි)
“A foolish man tells a woman to stop talking, but a wise man tells her that her mouth is extremely beautiful when her lips are closed”

    2. දවසකට විනාඩි පහළොවක් පමණ ඇය සමඟ සම්පූර්ණ අවධානය යොමු කර කාලය ගත කරන්න.
 ( අන්න නියම අදහස..... විනාඩි 15 ක් නම් මදි. කමක් නැහැ, එහෙම හරි කතා කරනව නම් අවධානයක් ඇතිව)

     3. ගෙදර පැමිණි විගස ඇය සමඟ විනාඩි කිහිපයක් ගත කරන්න.
( මහන්සි වෙලා නේද  එන්නේ.. ඒ නිසා කතා නොකරට තරහක් නැහැ....)

     4. විසඳුම් නොදී ඇය කියන දෙයට සවන් දෙන්න.
( මට නම් විසඳුම් ඕන ......... )

     5. ඇය කන්න කැමති දෙයක් ඇයට නොකියා ගේන්න.
( අන්න ඒකනම් නියමයි.... මම කන්න ආස.... ම්ම්ම් ආහ් වැනිල අයිස් ක්‍රීම් ....)

     6.නිතර නිතර ඇයගේ සැප සනීප විමසන්න..
( නැතත් තරහක් නැහැ අනේ.... )

     7.පරක්කු වෙනවා නම් ඇයට කලින් කියන්න.
( අන්න මේක නම් බෝල්ඩ් කරන්න තරම් වටිනව... හැබෑට පරක්කු වෙනව නම් මොකද කියන්න බැරි. නිදි මරා ගෙන බලා ඉන්නව නේද මම.....)

     8. ඇයගේ පෙනුම අගය කරන්න.
( අගය කරන්න තරම් පෙනුමක් නම් මට නැහැ. අනික බොරුවට කරන අගය කිරීම් වලට මම කැමති නැහැ)

     9. ඇයව සතුටු කරන මල්,මාල,වලලු,සුවඳ,විලවුන් වැනි කුඩා තෑගි ඉඳහිට ගෙන එන්න.
( මට නම් ඕන ඕව නෙමෙයි.... පුංචි හාදුවක් හොඳටෝම ඇති. මොකටද නිකම් වියදම් කරන්නේ )

    10.ඇය මහන්සියෙන් සිටින විට එය අවබෝධ කර එය පිළිබඳ විමසන්න.
(ඒක නම් අගෙයි..... )

    11.ඇයට ආදරෙයි කියා දවසට කිහිපවරක් පවසන්න.
(පිරිම්න් අඩුවෙන්ම කියන වචනයක්.... බඳින්න කලින් කොහොම වුනත් විවාහයෙන් පස්සෙ භාවිතයෙන් ඉවත් වන වචනයක් ද මන්ද... මම දන්න විවාහක ගැහැණු කිහිපදෙනෙක්ම කීව පරිදි ඒ අයත් තම ස්වාමියාගෙන් අහන්න කැමතිම එහෙත් නොකියනම වචනයක් ලු... )

    12.කන්තෝරුවේ සිට දවසට කිහිපවරක් ඇයට දුරකතන ඇමතුමක් දෙන්න.
(ම් ම් ම් අවශ්‍යම නැහැ.. පුලුවන් නම් හොඳයි තමයි. ඒත් මම නම් දන්නව එයා ගොඩක් බිසී කෙනෙක් කියල)

    13. ගෙදරින් පිටදි අන් අයට වඩා ඇයට සැලකිල්ලක් දක්වන්න.
( ඒකත් නම් හොඳ අදහස)

    14. ඉඳහිට කෙටි ආදර ගමන් බිමන් යන්න.
( හොඳයි තමයි... ඒත් මම නම් ආස නිවාඩු පාඩුවේ ගෙදර ඉන්න තමයි)

    15.විවේක කාලය ගත කිරිමට යා යුතු තැන් සොයා ගන්න. එහි බර ඇය පිට නොපටවන්න.
(ඇත්ත ඇත්ත.... කොහේ ගියහම මොකද එයත් එක්ක නම්)

     16. උපන් දිනය සහ දෙදෙනාගේ විශේෂ සැමරුම් දිනවල සුභ පැතුම් පතක් , ආදර හසුනක්, පොඩි තෑග්ගක් රහසේ ලෑස්ති කර එදිනට දෙන්න.
( පිරිම්න්ට හරියට විශේෂ දින අමතක වෙනව. ඒක හිතල කරන දෙයක් නම් නෙමෙයි... විවාහයෙන් පස්සෙ ලු ගොඩක්ම අමතක වෙන්නේ)
“Women always worry about the things that men forget; men always worry about the things women remember”

      17. ඇය සතුටින් සිටින විට එය වටහා ගෙන ඒ පිළිබඳව ඇය සමඟ කතා කරන්න.
( අමුතුවෙන් කතා කරන්නේ මොකටද අනේ... මට වැඩියෙන්ම සතුටු ඔයත් එක්ක කතා ‍කරන කොට තමයි)

      18. ගෙදර තිබෙන කැඩුන දෙයක් සාදා දීමට ඉදිරි පත් වෙන්න.
( ම්ම් දන්නවනම් විතරක් කරන්න. නැත්තම් වැඩේ දෙක වෙලා වියදම වැඩි වෙනව )

      19. ඇයට දොර අරින්න...
( ඇත්තටම මේ දේ ලංකාවේ නම් හරි අඩුයි... ඒත් බටහිර රට වල තවමත් තියෙනව. දොර ඇරියෙ නැතත් තරහක් නැහැ.... )
“When a man opens a car door for his wife, it's either a new car or a new wife.”

      20.බඩු ගත් පසු බර වැඩි මළු ඔබගේ අතට ගන්න.
( ඒකනම් එහෙම වෙනව නම් හොඳයි)

     21. ඇය උයන දේ රස බලා එහි හොඳ කියන්න.
( රස නම් විතරක් කියන්න. බොරුවට කීවොත් අමාරුවෙ වැටෙන්නේ ඔයාමයි )

      22.ඉදහිට විශේෂ කෑමක් උයා දීමට ඉදිරිපත් වන්න.
( ම් ම් නැහැ ...දෙන්නම සමගියෙන් හැදුවොත් මොකද ඉදහිට විශේෂ කෑමක් )

     23.  ඇයට මහන්සි විට තේකක් හදා දෙන්න...
( මට මතක් වුනේ කතන්දරගේ මෙන්න මේ කතාව )


     24. නාන කාමරය පිරිසිදුව තබා ගන්න.සෙරෙප්පු දමා ඇතුළට යන්න. පොළව කිලිටි වූ විට වතුර ගසා පිරිසිදු කරන්න.
( මම දන්න තරමින් නම් පිරිසිදු කමට ගැහැණුන්ටත් වඩා කැමති පිරිමි)


      25. විදුලි බුබුලක් අක්‍රිය වූ විට හැකි ඉක්මනින් අලුත් එකක් දමා දෙන්න.
( හොඳ අදහස... දැනට නම් අපේ ගෙදර මේ වැඩේ කරන්නේ මම )


      26. ඇය සමඟ කතා කරන විට ඇයගේ දෙනෙත් දෙස , නෙත් යොමු කරන්න.
( ඔට්ටුයි ඔයාට බැහැ මා දිහා ගොඩක් වෙලා එහෙම බලා ඉන්න.... )


      27. ඇය කියන විනෝද කතා වලට සිනා සෙන්න.
( හිනා යන්නෙ නැති දේවල් කීවම හිනා යනවයෑ නේද අනේ...)


      28. විශේෂ දවස් වල ඇයගේ ජායා රූප කිහිපයක් ගන්න.
( දෙන්නගෙම... තනියම ගත්තම ලස්සන නැහැ නෙ...)


       29. ගමනක් යෑමට ඇය හැද පැළඳ ගැනීම නිසා හෝ විවිධ ඇදුම් පැලදුම් මාරු කිරීම නිසා සිදුවන පරක්කු වීමට ඉඩ දෙන්න.
( ඒහෙම වුනොත් ඒ ගමනන නම් යන්න වෙන එකක් නැහැ ඕං... හා හා ඔයා බය වෙන්න එපා මම නම් විනාඩි 05න් රෙඩි)


       30. ඇයගේ බෙල්ල පිට  නැති නම් දෙපා සම්බාහනය කිරීමට ඉදිරිපත් වන්න.
( බටහිර රට වල දකින්න පුලුවන්. ලංකාවේ නම් අනේ මන්ද)


        31. මෙම ලැයිස්තුවට ඇය කැමති දේවල් එකතු කිරීමට ආරාධනා කරන්න.
( ලියන්න තීන්ත මදි වෙයි ඕං .. නොකීවයි කියන්න එපා )


මතක තියා ගන්න . මෙතන වරහන් ඇතුලෙ ලියල තියෙන්නෙ මගේ හිතට හිතෙන විදිහ මිසක් මුළු ගැහැණු සනුහරේටම හිතෙන විදිහ නෙ‍මෙයි හරිද..... මේ ලිපිය එයා කියෙවුවොත් එයාට මා ගැන අවබෝධයක් ගන්නයි මම එහෙම ලීවේ... සමහර විට ඔයාළගේ එයාලත් එහෙම හිතනව ඇති.............

  • “Man was made at the end of the week's work, when God was tired”
  • “When a man has once loved a woman he will do anything for her except continue to love her.”

Rose Leafs Pictures, Images and Photos
FlowerRoseOpensRedFlash Pictures, Images and Photos


එයාට ලකූණු දෙන
මම
෴වත්෴

Friday, June 25, 2010

෴ පාළුව ෴




මේ ලෝකේ කවුරු මැවුවත් මොකට මැවුවද .... මැවුවනම් ඇයි තනියම ජීවත් වෙන්න පුලුවන් විදිහෙ හයියක් දෙන්නෙ නැතිව මැවුවෙ.... ගොඩක් අය මවල .. තමන් වටෙත් ඉන්න ගොඩක් අයත් මවල .. ඇයි එකම එක කෙනෙක් ගොඩක්ම විශේෂ වෙන්න මැවුවෙ.....ඇයි?

ඔක්කමත් හරි ... ඇයි ඒ වගේ විශේෂ කෙනෙක් ගැන මතකයන් මතකයේ මේ තරම් රැදෙන්න මැවුවෙ ඇයි?
මිනිස්සු හිටි ගමන් වෙනස් වෙන්නෙ. ඇයි ?

 ජීවිතේ යම් තරමක් හරි සතුටින් හිටිය ඇයට ආයෙත් දුකක සේයාවන් පේන්න පටන් අරන්....බොහොම ආදරෙන් හිත ළඟ පරිස්සමට තියෙන දේවල් තමයි ඉක්මනින් වෙනස් වෙනව වගේ පේන්නේ ....

අපි හිතුවනම් යම් දෙයක් මගේ කියල ඇත්තම කතාව කිසිදෙයක් කවදාවත් ම මගේ වෙන්නෙ නැහැ. කවදාවත්ම නැහැ...
හැමදේම වෙනස් වෙනව.... හැමදේටම ස්වාධීනත්වයක් තියනව. පණ තියෙන කිසිදෙයක් කිසි කෙනෙක්ට අයිති තර ගන්නවත් ළඟ තියා ගන්නවත් බැහැ.ළඟ ඉන්න එකම දේ දුක පිරුණ සිත... 

කාල සර්ප යෝගය කියල දෙයක් තියෙනව අහල තියෙද? කෙනෙක් ගේ උපන් වෙලාව අනුව ඒ යෝගය තියේ නම් ජීවිතේ යම් දේවල් සෑහෙන ඉහළට ගියත් ජීවිතේ අනිත් පස හැමදාමත් අදුරුයි.... හරියට මිල මුදල් යාන වාහන රැකියා ව වගේ දේවල් ඉහලින්ම තිබ්බත් ආදරය විවාහය හිතූපැතූ තරම් තියා ටිකක් වත් පල දෙන්නේ නැතිලු. නැතිනම් විවාහය සෑහෙන හොද වුනත් මිල මුදල් යාන වාහන ගේ දොර ලැබෙන්නෙ නැතිලු...ඇයත් ඒ වගේ කියලයි මට හිතෙන්නේ....

දැන් මට කවි ලියන්න බැරි වෙලා... ඉස්සරත් බැහැ තමයි... පුලුවන් ටිකත් දැන් බැරි වෙලා... 

සඳ මුදු ලෙස අද අහසේ දිලිසෙනවා
නුඹ සිතු ලෙස යළි වෙනතක වැජඹෙනවා
ඇගෙ ලොව නුඹ නැති  තනි කම රජයනවා
සීතල කඳුළක් නොදනිම වැලපෙනවා

 හෙට දින අරුනළු ඇගෙ මුව සිපගන්නයි
නුඹ රජ වී ලොව  කිරුළු දරන්නයි
මගෙ ගොළු සිත ළඟ දොඩමලු වන්නයි
පාළුව තනිකම සුළඟට මුසු වන්නයි

සිනා අරන් නුඹ නිවසට ගොඩ වේවා
තනිකම තනියම එක පසකට වේවා
දෑස් විවර වී සුබ පැතුමන් දේවා
නුඹයි ඇයයි සිතු  ලෙස එක් වේවා



ඇය වෙනුවෙන් ලියූ
මම
෴වත්

Thursday, June 24, 2010

෴ ආදර ලකුණු පුවරුව ෴


මම ලීව" ෴ මා දකින පිරිමි ෴ 'ලිපියට පිරිමි අය වැඩි දෙනා දක්වපු ප්‍රතිචාර වලින්, මම ගත්ත අවසාන නිගමනය තමයි. ගැහැණු අඩනවට පිරිමි අය කැමති බව. සමහරු කියල තිබ්බ ,ගැහැණු අය අඩන කොට හරි ලස්සනයි කියල.....

කොහොම වුනත්, ඉඳල හිටල හරි පොඩ්ඩක් අඬන්න ඕන කියල මාත් අවසානේදී තීරණය කරා ඕං...( හරි හරි වැ‍‍ඩේම අඩන එක තමයි ඉතින්)

ඒ ‍ලිපියට දුකා කියල තිබ්බ ,කොමෙන්ටුව දැක්කම මම මගේ පොත් රාක්කෙ ලඟට තමයි ගියේ... "මේ තියෙන්නේ පොත..." අපේ අම්ම නම් කියන්නේ මේ ළමය ආදරේ කරන්න හදන්නෙත් පොත් වලින් කියවල කියලයි....

කොහොම වුනත් ඒ පොතේ 70 වෙනි පිටුවෙ තිබුන "ආදර ලකූණු පුවරුවේ'' ගැහැණියට ලකුණු දාගන්න පුලුවන් කියන ක්‍රම ටිකක්. ඉතින් මේ වයේ ඇත්ත නැත්ත අහන්නනම් හමුවන්න වෙන්නෙත් ඔබතුමන්ලම තමයි ඕං......

මෙන්න මෙහෙම ගැහැණු අය කටයුතු කරොත් පිරිමි ඔයාලගෙන් අපිට ලකුණු එනවලු....

  1. ඔහුගෙන් අතපසු වීමක් සිදු වූ විට එයට උපදෙස් නොදී සිටීම.( දවසෙම කියවාවි නේද වෙච්ච සන්තෑසිය ගැන)
  2. ඔහු නිහඩව සිටින විට ඔහුට වැරදි නොකීම.(වැඩි හරියක් පිරිමි ගොළුද මන්ද)
  3. වැඩ ඇරී ගෙදර එන විට ඔහුව පිළිගැනීම.ඔහු ගෙදර පැමිණිම සතුටක් බව පෙන්වීම.( ඒක නම් ඇත්තටම සතුටක්...)
  4. ඔහුගෙන් උපකාරයක් ඉල්ලා ඔහු එයට අකමැත්තක් දැක්වූ විට එය පිළිබඳ ඔහුට දොස් නොපැවරීම.( කට කහනව නේද?)
  5. ඔහුගෙන් එක වරක් ඉල්ලා ඔහු නොකළ උපකාරයක් ඔහු කරන්නේ යැයි සිතන අවස්ථාවක් බලා නැවතත් හොඳින් ඉල්ලීම (මායමි 64න් එකක් මේක නම්).
  6. ඔබ පමණක් තනියෙන් පවුලේ වැඩි බර කරට ගෙන වැඩ කරනවා යැයි සිතී දුක සිතෙන විට, ඔහුට බලපෑම් නොකර ඔබට අවශ්‍ය දෙය පැහැදිලිව ඔහුගෙන් ඉල්ලීම.(පැහැදිලිව කියන එක තමයි අමාරුම වැඩේ නේද?)
  7. ඔහු නිහඬව සිට නැවත කතාවට පැමිණි විට ඔහුට වෙනසක් නොපෙන්වා පෙර පරිදිම කතා කිරීම.( හහ්.. එයාට ඕන වෙලාවට විතරද මම කතා කරන්න ඕන)
  8. ඔහුගෙන් සිදු වූ වරදකට ඔහු සමාව ඉල්ලන විට එය ප්‍රතික්ෂේප නොකර බාර ගැනීම.(හරි හරි කමක් නැහැ සමාව දීම දේව ගතියක් ලුනේ)
  9. ඔහු ඉල්ලන උපකාරය ඔබට කළ හැකි නම් ,ඔහුට උපකාරයක් කරන බව නොහඟවා,එය පිළිබද උපදෙස් මාලාවක් නොදී එය කිරීම.(සතුටින් උදවු කරමි)
  10. ඔහු ඉල්ලන උපකාරය ඔබට කළ නොහැකි නම් ,එය නොකිරීමට හේතු ලයිස්තුවක් ඔහුට සපයන්නේ නැතිව , එය නොකර සිටීම( හේතු නොදක්වා නොකර ඉන්න බැහැනේ).
  11. ඔහු කරන සුළු සුළු ආදර ක්‍රියා වලට ප්‍රසංසා කිරීම.(හරි හරි මෙන්න ප්‍රසංසා)
  12. ඔහු සමඟ ආදරයෙන් කාලය ගත කිරීමට කැමති බව පෙන්වීම.( අපොයි කවුද අනේ  අකමැති)
  13. යතුර සොයා ගැනීමට ඔහුට අපහසු වූ විට , එයට ඔහුව වැරදි කාරයා නොකිරීම.( මටම තමයි හොයන්න වෙන්නෙ)
  14. ඔහු සමඟ ගමනක් යන විට ගමන යා යුතු මග පිළිබඳ ඔහුට උපදෙස් නොදී, එය සොයා ගෙන ඔබව එම තැනට ගෙන යෑමේ ගෞරවය භුක්ති විඳීමට ඉඩ දීම.( අමාරුවෙන් හරි ෂට් අප්)
  15. ඔහු යමක් පැවසූ විට , එයට අකමැති නම් එය වැරදි බව අගවා මම නම් කරන්නේ මෙහෙම යයි ඔහුට උපදෙස් නොදී කිසිවක් නොකියා සිටීම.( ආයෙත් ෂට් අප් මයි මවුත්)
  16. ඔබගේ වේදනාවට ඔහු වැරදිකාරයා නොකර එය පිළිබදව ඔහු දැනුවත් කිරීම.(අපි වේදනා විදින්නෙම ආදරේ කරන ඔහු නිසාම තමයි ඉතින්)
  17. ඔබ කරන කියන දෙයකින් ඔහුගේ සිත රිදුන විට එයට සමාවෙන්න යැයි කියා ඔහු බලාපොරොත්තු වන ආදරය ඔහුට ලබා දීම.( සමාවෙන්න රත්තරනේ වරද මගෙ )
  18. ඔහු සමඟ ලිංගිකව සම්බන්ධ වීමට කැමති වීම.ඔබ කැමති අවස්ථා වලදී ඒ බව ඔහුට ඇඟවීම.( තවම අදාල නොවේ)
  19. ගෙදර ඇති වෙන ප්‍රශ්ණයකට ඔහුට වරද නොපටවා , එයට විසඳුමක් ඔහුගෙන් විමසීම.( ප්‍රශ්ණ වලට මුලත් එයාම වෙන්න ඇති)
  20. ඔහු කළ දෙයක් නිසා ඔබගේ සිත රිදුන විට, ඔහුට දඬුවම් නොකර සිටීම...( හ්ම් ඒවටත් ඉතින් මගේ සිතම දඩුවම විදපුවාවේ එහෙනම්).
 පිරිමන්ටම ගිය රට නේ මේක.....

තරහ අවසර මේ 1 සිට 20දක්වා උපුටා ගත්තේ වෛද්‍ය ප්‍රියංගද සොයිසා මහතාගේ ගැහැණු ලොව පිරිමි ලොව පොතෙන්.... මේ ඔය පුංචි අකුරින් වරහන් ඇතුලෙ තියෙන්නෙ ගැහැණු මගේ සිතට හිතුන හැටි....

අර කියමනක් තියෙනව නෙ..." men from mars women from venus" කියල.... සහතිකේටම හැබෑව ...

සිකුරු ලොවෙන් ආව 
මම
෴වත්෴

ආහ් ... තව ටිං‍ගිත්තෙන් අමතක වෙනව නෙව... ඒ පොතේම 65 වෙනි පිටුවෙ තිබුන.. අපෙන් ඔයාලට ලකුණු ගන්න පුලුවන් ක්‍රමත් ලියල... 

Tuesday, June 22, 2010

෴ මා දකින පිරිමි ෴

හ්ම් ‍... අවිවාහක ගැහැණු ළමයෙක් වන මට හරිම බැරෑරුම් මාතෘකාවක්... ඒත් සිතේ දඟලන ප්‍රශ්ණ කිහිපයකට පිළිතුරු සොයා ගන්නත් එක්කම තමයි මේ පෝස්ට් එක ලියන්න හිතුනෙ...

"ගැහැණු අඬනව දැකල තියෙද? ""අපෝ ඕන තරම්. ගැහැණු වැඩි හරියක් ඉන්නේ නාහෙන් අඬා ගත්ත ගමන් නෙ."
එතකොට පිරිමි - බොහොම අඩුයි අඩුනව. දරා ගැනීම දෙදරා ගියහම අඩනව.( ඒත් බ්ලොග් අවකාශයේ මම දැකපු පිරිමි පරාණ නම් හොටු පෙරා ගෙන අඩා ගත්ත ගමන්ම තමයි.අනන්‍යතාවය සැගවෙන නිසා අඩනව ඇති)
"එතකොට පිරිමින් ට දුක දැනෙන්නෙ නැද්ද. ?"
"ඇයි නැත්තෙ ,ලෝකෙ දුකින් ඉන්න ගැහැණුන්ට වඩා දුකින් ඉන්න පිරිමි තමයි වැඩි."
"එහෙනම් ඇයි එයාල දුකේදි නාඩා ඉන්නේ.....?"

දුක විතරක් නෙමෙයි... පිරිමි මූණ හැඟීම් ප්‍රකාශ කරනව හරිම අඩුයි. හිනා වෙනව හරිම අඩුයි. හැබැයි හිනා වෙන්න ඕන දේට නම් අනිවාරයෙන් හිනා වෙනව... ඒත් හැඟීම් ( දුක ,සතුට ,ආදරය, වේදනාව ,පාලුව ,තනිකම වගේ දේවල්)  නොපෙන්වා එකම මුහුණ පෙන්නන් ඉන්න පිරිමින්ට පුලුවන්...රාගය වුනත් පෙන්නන් අඩුවෙන්....හැබැයි ඉතින් අපරාදේ කියන්න බැහැ තරහ මුහුණ නම් මල් පහට පෙන්නනව...

පිරිමි අඩනව මට නම් බලන් ඉන්න බැහැ.මගේ තාත්තා අඩනව මම මගේ ජීවිතේටම දෙපාරයි දැක්කෙ. ඒත් තාත්තට හිතා ගන්න බැරි තරම් දුක් වේදනාවල් ආව වෙලාවෙවත් තාත්තා ඇඩුවෙ නැහැ. තාත්තා ඇඩුවෙ එක පාරක් මම මැරෙයි කියල බය වෙලා අනිත් පාර අපේ අම්ම ට අනතුරක් වෙයි කියල බය වෙලා.එදා තාත්තා මාව බදාගෙන ඇඩුව හැටි දැනුත් මතකයි. තාත්ත අඩනව දැක්ක මට මගේ සියලුම වේදනා අමතක වෙලා ගියා.....

මම තාත්තා ගැන කියන්නේ, මම මෙතෙක් කාලෙකට ආසන්නයෙන් ම දැකපු එකම පිරිමි කෙනා මගේ තාත්ත නිසයි.එක සැරයක් බොරු මිනීමැරුමකට මගේ තාත්තා ගෙනියන්න ආව වෙලාවෙ වත් තාත්තාගෙ දෑසෙ දුකක්, පසුතැවිමක් ,වේදනාවක් ,සිනහවක් කිසි දෙයක් මම දැක්කෙ නැහැ. හැබැයි එදා මම දෝරේ යන්න තරම් ඇඩුව. තාත්ත මගේ හිස අතගාලා කීවේ "ලොකු පුතේ මොනා කරන්නද ? මේ තමයි ජීවිතේ. මම වරදක් කරල නැහැ නෙ ළමයෝ "කියල විතරයි.

පාරේ තොටේ යන කොට නම් මේ වගේ පිරිමි අනන්තවත්...

හරි හරි.... දැන් මට දැන ගන්න ඕනි මෙච්චරයි....

අනේ ! මට කියා දෙන්න ,පිරිමි ඔයාල ඇයි එහෙම ඉන්නෙ.?අඩු ගානේ ආදරේ දැනෙද්දි හරි මුහුණෙන් ඒ බව පෙන්වන්න ඔයාලට බැරිද?
පිරිමි ලෝකෙම මට නම් ප්‍රහේලිකාවක්....

මම නම් කැමති පිරිමි ඔයාල මේ වගේ ඉන්නවටයි..

පිරිමි ලෝකයේ අතරමං වූ
මම
෴වත්෴

Monday, June 21, 2010

෴ ආදර හැඟුම් ෴

Fantasy girl Pictures, Images and Photos

ඉස්සලාම ආදර හැගීමක් දැනුන දවසෙ මට ඒ බව දැනුනෙ මගේ බඩේ සමණළයො පියාඹනව වගේ . ඒත් දුකක් ඉතිරි කරල ඒ හැගිම කෙමෙන් කෙමෙන් වියකිලා වියලිලාම ගියා........ සමහරු මම දැකල තියෙනව නැතිවූ දේ ගැනම හිතල තැවි තැවි දුක් විඳිනව. ජීවිතේ කාලකණ්නිකර ගන්නව... ඒත් කාලයත් එක්ක ඒ හැම කඳුළක්ම වියකෙනවා.....
මාත් ඒ කාලේ අර මගේ බඩේ හිටිය සමණල්ලු ටික අල්ලල කූඩුවක දාලා දූර වනාන්තරයක ගිහින් දැම්ම. මට මා සමඟත් සමණල්ලු සමගත් තිබ්බේ පුදුමාකාර තරහක්.....
ඒත් ඒ සමණල්ලු ආයෙත් මුදා හරින්න කා‍ලය ඇවිත්......
මල් වල සියුම් සුවඳ විදින්න , මල් ගොමු අතර සැරිසරන්න ආයෙත් කාලය ඇවිත්......
සමණළ හැඟිම් වලින් තොරව නියම ආදරේ දකින්න පුලුවන් වයසට මම දැන් ඇවිත්..... ඒ නිසා සමණල්ලුත් එක්ක දැන් මම තරහ නැහැ....
මට එදවස ආදරේ කියා දුන්න ඒ වගේම වෙන්වීමේ දුක කියා දුන්න නුඹ එක්කවත් මම කවදාවත් තරහ නැහැ.....
හැමදාම නුඹට ස්තූතියි
ආදරේ කියන්නේ ආදරේ මිසක් වෙන මුකුත් නෙමෙයි
ආදරේට දුක සුසුම කඳුළ එකතු කරන්නෙ අපිමයි...
ඒක අපේ වැරුද්ද මිසක් ආදරේට දොස් කියන්න නරකයි
ඉතින්
 ආදරේට ආදරේ කරමු

ආදරේට ආදරේ කරන
මම
෴වත්෴

Saturday, June 19, 2010

෴ පසුම්බිය (03) ෴

 පසුම්බිය 01 බලන්න 


 පසුම්බිය 02 බලන්න


අද දින නිවාඩු ගෙන නිවසෙට වී සිටින්නේ මගේ දැඩි නොකැමැත්ත මත වුනත් ,වදක භාර්යාවගේ දැඩි ඉල්ලීම පරිදි ඇගේ වුවමනාවටය. ඇගේ විදේශ ගතව සිටි යෙහෙලියක් ඈ බැලීමට නිවසෙට පැමිණීම එයට හේතුවයි... මා ඒ අවස්ථාවේ නිවසේ සිටිය යුතුම වූයේ , යෙහෙළයගේ සැමියාද පැමිණෙන බැවිනි.....

පැය ගෙවී යන්නේ පෞද්ගලික බසයක් ගමනාන්තයට ලගා වන්නා මෙන් ඉතා සෙමිනි.......

අවසානයේ ඇගේ යෙහෙලියත් යෙහෙලියගේ සැමියාත් සැපැත් වූයේ මා සිතට ගිනිවද්දමිනි..


මේ මුහුණ ... කෙදිනකවත් අමතක නොවන මේ මුහුණ... සැමදා මා සොයමින් සිටි  මා වෛර කරමින් සිටි ඒ පිරිමි මුහුණ. අහඹුවක් නම් විය නොහැක... සියුම් වෙනස්කම් ඇතත් මා නෙත රැවටිය නොහැක මේ ඔහු නොවේද..... මගේ ආදරය බිලිගත් මා ජීවිතයම නිරයට ඇද දැමීමට සමත් වූ ඒ මුහුණ......

එහෙත් ඔහුගේ බිරිද වී සිටින්නේ මා පෙම් කළ ඇය නොවේ.... කාන්තාරයක ගිනිමද්දහනේ පිපාසවෙන් තනිවූ මඟියෙකු මෙන් මා ගත දැවෙන්නට විය.... 

"සුපුන් .. ,ඩාලින්, මේ දිනුෂිගේ හස්බන්ඩ් මිස්ට දහනායක.........." මගේ බිරිඳ තව මොන මොනවදෝ දොඩවන අතර ,ඔහු මා අතට අත පායි.

"මේ මූණ .. මේ මූණ... මේ මූණ මම දන්නව......." ගොතයක් ලෙසින් ,උන විකාරයෙන් පෙළෙන ලෙඩකු ලෙසින් මගේ මුවින් පිට විය.....

"අපෝ,ඔය මූණ නිසා මගේ යාළුවෙක්ගෙ එපෙයාර් එකත් බ්රේක් වුනා ...." ඒ හඩ ඔහුගේ බිරිඳ ගෙනි....

"ඒ කොහොමද දිනූ.... "ඒ මගේ බිරිඳයි..........

"මේකනේ ප්‍රියන්වදා .. ඒ දවස් වල  මගෙයි මෙයාගෙයි එපෙයාර් එක ගෙදරට ආරංචි වෙලා අයියලා මා පස්සෙමයි වුන්නේ.... හෑන්ඩ් බෑග් එක පවා ගෙදරින් චෙක් කරා ඒ කාලේ... ඉතින් මම මෙයාගේ පොටෝ එකක් තිබිල ..මගේ හොඳම යාලුවගේ පර්ස් පොකටි එකේ තමයි දාලා තිබ්බෙ පරිස්සමට.... "

"ඉතින් දවසක් .............."

ඇගේ කතාවේ ඉතිරිය ඇයට වඩා හොඳින් මම දනිමි.......

ඇගේ බිය පත් දෑස මා දෑස ඉදිරියේ දැනිදු මැවී පෙනෙයි............ 

අහෝ .. ඇගේ දෑස .... ඇගේ දෑස මේ සියල්ලටම වගකිව යුතු නොවේද.....


පසුම්බියෙන් ඉවතට විසිවුන 
මම
෴වත්෴

ප:ලි:- කතාව ඉවරාරාරාරාරායියි (බනින්න එපෝ... දන්න විදිහට ලීවෙමි)

෴ පසුම්බිය (02) ෴

 පසුම්බිය (01) මෙතනින් බලන්න.......


ඉතා පිළිවෙලට හසුරා තිබූ එය විවෘත කර සැනින් හැමූවේ ඇගේ ළඟින් නිතරම මට දැනෙන ඇගේ සුවඳයි.... 
නමුත් ........... 
මේ මා නොවේ ..... එහි තිබු පාස්පෝට් ප්‍රමාණයේ ජායාරූපයේ වූයේ... කවුද... මද සිනහවක් සහිත කඩවසම් යැයි කිව හැකි පෙනුමක් තිබූ ඒ මුහුණ අද වුවද පැහැදිලි චිත්‍රයක් ලෙස මා සිතේ සනිටුහන් වී ඇත... කවුරු වුවත් ඔහු , ඇගේ සිතේ වැදගත් තැනක් ගත් කෙනෙක් විය යුතුය... ඇයට සහෝදරයන් නැත... සිටින මිතුරන් කිහිපදෙනාද මා හොදින් හදුනන අයයි....
මොහොතින් මා  ගිනිගත් මාගේ දෑස යොමු වූයේ ඇය වෙතටයි...... මා සමඟ වූ පොර බැදීම අවසන් වූ ඇය හිටි පිළිමයක් මෙන් බියගත්, කඳුලු පිරි දෙනෛතින් මා දෙස බලා සිටියි............


"කවුද මේ..........." 
"ආහ් කවුද මේ හාදයා..."

"මටත් වඩා, ඔයාගේ ලගින්, ඔයාගේ පර්ස් එකේ ඉන්න තරම් වැදගත් කෙනා කවුද....."

ඇය කතා කිරීමට කට ඇරිය මුත් ,මම ඉස්සර වුයෙමි.... දැන් මට සියල්ල පැහැදිලිය.... නන්නාදුනන දුරකථන පණිවිඩ මගින් මා සවනට වැකුණු සියළුම දේ මම බැහැර කරේ ඈ කෙරේ මා තුල වූ අධික විශ්වාසය නිසයි.... 

"එහෙනම් හැමදේම ඇත්ත... " 
"තමුසෙ දැනගන්නව හැමදාම හැමකෙනාම රවටන්න බැරි විත්තිය...හොඳයි ,මම හොයා ගන්නම්කෝ වූ කවුද කියල... ඔයාගෙයි මගෙයි සම්බන්ධකම් අදින් ඉවරයි කියල මතක තියා ගන්නව."යි 
පවසමින් මා පසුම්බිය ඇය වෙත දමා ගැසුවෙමි..........

ඇගෙන් ඉවතට වේගයෙන් පිය මැන්න මා පසුපස, ඇය හඩමින් මොන මොන වාද පවසමින් පැමිණියත් නැවත හැරී බැලුවේ හෝ... සවන් දුන්නේ මා නොවේ.................


"මහත්තයා කඩල එකක්............."

කඩල වෙලෙන්දාගේ ඇමතීමෙන් වර්තමානයට පිවිසි මම, මගේ වර්තමාන නිවස නම් ස්ථානයට අකමැත්තෙන් හෝ පිය මැන්නෙමි......

ඇය දැන් කොයිබ කෙසේ සිටී දැයි මා නොදනිතත්... ඈ මා රැවටීම හැරුණ කොට ඇගේ අන් සියලුම ගතිගුණ මට ඉතා ප්‍රිය විය.... මා ඈ කෙරේ බැදුනේද එබැවිනි.......

මගේ ප්‍රිය භාර්යාවගේ ඇනුම් බැනුම් දෝශාරෝපන වර්ෂාවට අසුවී මාගේ ආත්මය  හැකිලී යන අවස්ථා වලදී මා රැවටූ ඇය ගේ නිවුන ඉවසුන ගති මට නිතැතින් මතක් වීම වැලැක්විය නොහැක්කේ එබැවිනි....

ඇය වැනි ඉතා නිවන සැනහුන සොඳුරු ගති ඇති ගැහිණියක් මා රැවටුවේ කෙසේද යන්නත් ඒ ඇයිද යන්නත්,  අදටත් මගේ සිතට යවුලකින් අනින්නා මෙන් වදදෙයි....


"ඇය මට එසේ කළේ ඇයි ..."


තව දුරටත් පසුම්බියේම සිරවී සිටින 
මම
෴වත්෴

Friday, June 18, 2010

෴ පසුම්බිය (01) ෴

කාර්යාල සඟයන් යුහුසුළුව නිවෙස් බලා යාමට සැරසේ... සිකුරාදා දින බැවින් තද බදයද අධිකය.... දරුවෙක් සිටින පවුල්කාරයෙක් වන මට මෙවන් කඩිමුඩියක් නැත්තේ ඇයිදැයි මටම පුදුම සිතේ....සෑමදිනකම මෙන් කාටත් පසුව කාර්යාලයෙන් මහමඟට පිළි පැනු මම වෙනදා නිවෙස බලා යන මඟ වෙනුවට මේ මඟ තෝරා ගත්තේ ඇයිදැයි මටම නොතේරේ.... නිවෙසට යැම තවත් ප්‍රමාද කිරීමට ගත හැකි සෑම උත්සාහයක්ම මම ගනිමින් සිටින්නෙමි...........

නොදනීම මා පැමිණ සිටියේ තෙරක් නොපෙනෙන මහ මුහුද පොළව සිප ගන්නා අඩවියටයි... බැස යන හිරුත්, කඩල වෙලෙන්ඳන් .... තැන තැන කුඩ වලට මුවා වූ පෙම්වතුන් මගේ සිත අතීතයට රැගෙන ගියේය.....

ඇ‍ගේ ඇඟටම තෙරපී, ඇ‍ගේ සුවඳ සිත පුරා විදිමින්, තෙරක් නොපෙනෙන මුහුදේ ගිලෙන හිරු දෙස බලා සිටියේ.ඇය ගැන උපන් ‍ස්නේහයෙන් සහ හිරු ගැන උපන් ක්‍රෝධයෙනි.... හිරුට තවත් මොහොතක් ඉවසන්න බැරි මොකද... තව මොහොතින් අඳුර වැටීමත් සමඟම ඇගේ සුපුරුදු ඉල්ලීම් ගලා ඒමට පටන් ගැනීම එයට හේතුවයි......

"බලන්න සුපුල්, දැන් හොඳටම හවස් වෙලා.... මම දැන් යන්න ඕන.... "කියමින් පටන් ගන්නා ඉල්ලීම් අවසානයේ කෙළවර වන්නේ ඇගේ නික්ම යෑමත් සමඟින්ය... පොඩි දරුවකු අතින් ඔහු ආසම ‍රස කැවිල්ල උදුරුගත්තා වැනි හැඟිමක් එවිට මා පෙළයි.......

ඇගේ නික්මීම හැකි තරම් කල් දැමීමට සුදුසු සෑම පියවරක්ම මම ගනිමි...ඒ මා නොදනුවත්වම වන ක්‍රියාවන් මගිනි.....

දැනට මොහොතකට පෙර, කඩල වෙළෙන්දාට දීමට මාරු කාසි මා ළඟ නොවූයෙන් මාරු කාසි දීමට ගත් ඇගේ පසුම්බිය ඈ සුරතේ දඟ කරයි...එය පිරිම් බාවිත කරන වර්ගයේ පසුම්බියක් සේ පෙනුම ගත්තත්.. කාන්තාවන් බාවිත කරන විදේශගතව සිට පැමිණි මිතුරියකගෙන් ඇයට ලැබුන ත්‍යාගයක් බව ඇය මා සමඟ පවසා ඇත..දෙවරක් නොසිතූ මම ඇගෙන් පසුම්බිය උඳුරා ගත්තේ ඇගේ නික්මීම පමා කිරීමේ පලමු පියවර ලෙසිනි.... ඈ මා සමඟ පොර බැදුවේ පසුම්බිය නැවත ඇය වෙත අත්කර ගැනීමටයි......නමුත්......ඒ වන විට ඇගේ වත ඉතා බියගත් බවකින් පෙලෙන්නට වන බව මට හැගිනි....

සාමාන්‍යයෙන් නම් ඇගේ නික්මීම පමා කිරීමට මා ගන්නා උත්සාහයන්ට ඇය දක්‍වන්නේ කැමැත්ත මුසු මවාගත් කෝපයක් පමණි............

ඇගේ බියපත් දෑස දුටු මගේ සිත, කුහුලෙන් පිරුණ බව නොකියාම බැරිය... ඈ මගේ වුවත් මම කිසි දිනෙක ඇගේ පසුම්බිය විවෘත කර එහි වූ දේ සොයා විමසා නැත.... ගැහැණු රහස් පසුම්බියේ පිරී ඇති බව මම අසා තිබුණෙමි...........

ඒ සැණින් ඇගෙන් මිදුන මම පසුම්බිය විවෘත කළෙමි...... 


පසුම්බියේ සිරවී සිටින
මම
෴වත්෴

Thursday, June 17, 2010

෴ කවදා නුඹ ඒවිද මන්දා ෴



දෙමලිච්චන් රංචු ගැසී ගීත ගයනවා
නුඹයි මමයි ගැනදෝ මන්දා
සුවඳ හමන රෝස කුසුම් පිපී දිලෙනවා
වෙදාටත් තිබුනිද මන්දා

සෝක සුසුමු දුක් කඳුළැල් තිබුනිද මන්දා
සතුටින් සිත ඉපිලී යනවා
මේ හසරැල් නුඹ ගෙනාවේ කවද ද මන්දා
මගේ ලොවම සුවඳ හමනවා

අද වගේම සුවඳ හෙටක් නුඹෙන් පතනවා
නුඹ මට හිමි වේවි ද මන්දා
සිතට සිතින් නුඹයි මමයි කතා කරනවා
අත්වැල් පැටලේවි ද මන්දා

අනේ මන්ද කිය කිය ඉන්න 
මම
෴වත්෴

Wednesday, June 16, 2010

෴ වැස්ස වී වඩින් මා වෙත තවත් දුක නොදී ෴


මුලින්ම කියන්න ඕනි මේ මගේ නිර්මාණයක් නම් නෙමෙයි.... රොහාන් ශාන්ත බුලේගොඩ මහත්මයා ගායනා කරන සුමිහිරි ගීතයක්....මේ දවස් වල මගේ හිතට හරිම සමීප බවක් මේ ගීතයේ දැනුන..ඉතින් මට ඒ සමීපබව ඔයාලත් එක්කල බෙදා ගන්න හිතුන... MP 3 එකක් සොයා ගන්නත් බාගන්නත් හිතන් හැමතැනම සෙවුවවත් සොයා ගන්න බැරි වුනා....දන්න කියන කෙනෙක් ඉන්නව නම් ලින්ක් එකක් දෙන්න....ගොඩක් ස්තූතියි .....ආදරේ කරන එක වගේම ආදරේ නිසා හිතට දැනෙන දුකෙත් සියුම් මිහිරක් තියෙනව නේද ..........



මලට මුව තියා
මල් මත බඹරුනුත් ගියා 
විලට මුව පොවා 
දිය බිවු සාවුනුත් ගියා
සුමුදු බස් කියා
තොල් මත හාදුවක් තියා
දුරක නුඹ ගියා
මේ හැටි මටම දුක තියා
අහස නුඹ වගෙයි
මා හා ආදරෙන් සිටියි
පොළව මා වගෙයි
ලතැවුල් දරාගෙන ඇතී
නියං සැර වැදී 
හද මිහි මඩල ගිනි වදී
වැස්ස වී වඩින් 
මා වෙත තවත් දුක නොදී

නියං සැර පොළවට වැස්සක් වී නුඹ වඩිනකම්
බලා සිටින 
මම
වත්෴

Tuesday, June 15, 2010

෴ ලස්සන ෴

Life Quote Pictures, Images and Photos


"ලස්සන හැමදේ,මොහොතක සුවදේ "කීවට අපි කවුරුත් ලස්සන දකින්න,විදින්න කැමතියි.....ලස්සන වුනත් දකින විදිහ කෙනාගෙන් කෙනාට වෙනස්.කෙනෙක්ට ලස්සනදේ තවත් කෙනෙක්ට ලස්සන නැහැ... නිසා වෙන්න ඇති සමහරු කියන්නේ ලස්සන තියෙන්නේ දකින කෙනාගේ ඇස් වල කියල.
නුඹ සිත සුවඳ මිස
පාටින් පලක් නැතී
යහගුණ නිතින් මා
සැමවිට සුවෙන් ඇතී
සොඳුරු ගුණ සුවඳ හමනා නුඹෙන් නිතී
නෙක නෙක පාට මල් යායේ
සමන්මලී
"The greatest treasures are those invisible to the eye but found by the heart.”
තවත් සමන්මලී කෙනෙක් වන
මම
෴වත්෴





Blogroll

Related Posts Plugin for WordPress, Blogger...