~~~ යහළුවෝ ~~~~~

තුරු සෙවනැලි සිසිල සදන

තුරු ගොමුවක් සේ  

සිහින් සරින් පද මුමුණන

පවන් රැළක් සේ

ගිමන නිවන සුනිල වළා

දිය දහරක් සේ

මිතුර නුඹයි නුඹෙ සෙවනයි

වන අරණක් සේ

එක සිතකින් මසිත තැලී

හිදින වෙලාවේ 

මහ සයුරේ රුවල බිදී  

සිටින වෙලාවේ

ඝන අඳුරේ ලොවට හොරෙන්

හඬන වෙලාවේ 

පහන් ටැඹක ආලෝකය

ඔබයි ගෙ​​නාවේ

අතීතයෙන් ගලනා ගඟ

දෙනෙත නිමනවා

හද ගී පොතේ ගී මිණි මුතු

සවන නිමනවා

මරුවා වුනත් හෝරාවක්

තනිය මකනවා

මේ සැම සමග සොඳුරු සිතක්

එළිය දකිනවා

පහන් ටැඹෙන් මඟ අහන මම

~ වත් ~

~~~~ තනි වූ මල ~~~~~

නෙලා ගන්නට කෙනෙක් නැතී
බලා සැනසෙන කෙනෙක් නැතී
පිපී දිදුලන මලක් ඇතී
ඇගේ නම වෙයි අරුන්දතී

සුමුදු සුදුමුදු පෙති සලා
ඇගේ උවනත දෙයි සිනා
රොන් සුවද විසිරී නොයා
ඇය සිටී මුදුනට වෙලා

බඹරු ආවාත් රොන් සොයා
යන්නෙ ඈ සිත රිදවලා
නෑ වෙන්නෙ මම් මං මුලා
ඇගේ හද දුක ගුලි වෙලා

යන්න පෙර මල පර වෙලා
දෙන්න මධු මී පුරවලා
එන්න සමණළයෙක් වෙලා
සිටී ඈ නෙතු දල්වලා

අරුන්දතී තුල මා සොයන
මම
~ වත් ~

බාල සහෝදරයා .....

මේ ඉන්නෙ මල්ලියි මායි

චන්ඩියා වගේ හිටියට පේනවද ලැජ්ජාවෙන් මූණ රතු වෙලා. මට හොද හැටි හේත්තුවකුත් දාගෙන සැප පහසුවෙන් ඉන්නව.

මේ දවස්වල ස්කෝල නිවාඩු නිසා මෙයාගෙ වැඩේම සෙල්ලම තමයි. ගහකොළට සතා සිවුපාවට හරිම ආදරෙයි.   එයාගෙ මාළු ටැංකියෙ හිටිය සාරිගප්පිය මැරිල දවසක්ම අඩ අඩ ඉදල බතුත් නොකා නිදා ගත්ත මට අද වගේ මතකයි. මුළු වත්ත පිටියෙම ඉන්නෙ එයාගෙ යාළුවො තමයි. ඒ ඔක්කෝටම එයා නම් තියල තියනව.

මෙහෙම හිටියට ඉගෙන ගන්නත් දස්සයා. හැබැයි අකුරු ලියන්න නම් වස කම්මැලියා. අකුරුත් නිකම් හකුරු වගේ.ගණන් හදන්න නම් හරිම දස්සයා.

පිලිවලකට ඇදුම් අදින්න කොණ්ඩෙ පීරන්න කිසිම වුවමනාවක් එයාට නැහැ. හැබැයි මගේ කොණ්ඩෙන් ඇදල  මාව තරහ ගස්සන නම් හරිම රුසිය. එයා මගේ කොන්ඩෙ අදින්නෙ නැත්තම්  මගේ කොණ්ඩෙ මීට වඩා ගොඩක් තියනව.

මට වඩා බාල වුනාට හිතන් ඉන්නෙ මම මුකුත්ම කර ගන්න බැරි ගැහැණු ළමයෙක් කියල. හරි පණ්ඩිතයි. "අක්කට ඕව බෑ, ඉන්න මම කරල දෙන්න කියල හැමඑකටම හොට දානව."

එයාට කරන්න බැරි මට කරන්න පුළුවන් එකම දේ තමයි බත් කන එකයි එයාට බත් කවන එකයි.

දන්නවද ඔයාල මගේ මේ පුංචි සහෝදරයා මගේ තවත් සැබෑ නොවූ හිනයක්. මම පුංචි එකා කාලෙ ඉදල බාල සහෝදරයෙක්ට හරිම ආසාවෙන් හිටියෙ.... බාල අය හිටියත් එයාල සහෝදරයො නෙමෙයි... සහෝදරියො... අපේ තාත්තා  අනාථ අහිංසක කොළු පැටියෙක්ව ගෙනල්ල හදන්න හිටියත් අම්ම ඒකට විරුද්ධ වෙලා තියනව.

ඒත් කොහෙදෝ ඉදල මේ ලගදි දවසක මට මගේ බාල සහෝදරයා හමුවුනා කියල මට හිතෙනව.... එයා ටිකක් විතර කපටි ..ඒ වගේම තමයි මගෙ හිත හරියට රිදවනව. කොන්ඩෙන් ඇදල දුවල යනව වගේ තමයි.

මිනිස්සුන්ගෙ හීන පහුවෙලාහරි හැබෑ වෙනවලූ. හිතන විදිහට නෙමෙයි නොහිතන විදිහට... ජීවතේම මැජික් එකක් කියල හිතෙන්නෙ ඒ වෙලාවට තමයි.

මම
~ වත් ~

......... ඇය .............

ඇය කිවයුතු තරමේ රූපසම්පත්තියක හිමිකාරියක නොවූවාය. නමුත් ඇයගේ සොදුරු සිතත්, අවංක හදවතත් ,සංවේදි සිතුවිලිත් ,සෘජු ගතිගුණත් නිසා විශ්වාසය තැබිය හැකි අපූරු  මිතුරියක් වූවාය.

නිවසේ දී ඇය කිසිදු වැඩකට සම්මාදන් නොවූවාය. ඇයට කිසිවකු වැඩ පැවරුවේද නැත. ඇයව අවශ්‍ය වන්නේ නිවසේ වහලයේ සුළු සුළු අළුත් වැඩියා කටයුත්තකදී .... මේසයක් පුටුවක් එහා මෙහා කිරීමේදි ,බිත්ති ඔරලෝසුවේ බැටරි මාරු කිරීමේ දී සහ මදුරු දැල එල්ලා ගැනීම වැනි සුළූ සුළු කටයුතු වලදී පමණි.

කාර්යාලයේදී උත්සව කටයුතු වලදී මුදල් ගනුදෙනු බාර දීමට තරම් ඇය විශ්වාසවන්ත නිලධාරිනියක වූවාය.  කාර්යාලීය සුභ සාධක සංගමයේ භාණ්ඩාගාරික වීම ඇගේ සිතට ගෙන දුන්නේ වදයකි.කාර්යාලයේ  පුංචි කඩ වලට ඇය සම්සාදම්වන්නේ බොහොම ඉදහිටය. බොහෝ විට ඇය දැකිය හැක්කේ පරිගණකයක් අසලය.

පෝයකටවත් පන්සල් නොයන ඇයට අම්මා බනින්නේ පින නැහැ කියාය. නිවසේ සියලූ දෙනා පන්සල් ගිය පොහොය දින වලට ඇගේ සිතට දැනෙන සුවය පන්සල් ගොස් ලබන්නට බැරි බව ඇගේ මව නොදනී. පන්සල් නොගියද  පන්සල් යෑමට අවශ්‍ය සියලූ දේ සූදානම් කර දෙන්නේ ඇයයි.

ඇය මවට ඉතා ආදරේය නමුත් ඇගේ මව එය දන්නේදැයි සැක සහිතය. ඇය සහෝදරියන්ටද ඉතාමත් ලෙංගතු අක්කණ්ඩියකි.

ඇයට මිතුරියන් අඩුය. මිතුරන් බොහෝය. එයට හේතුව ඇය නොදනී. "මෙච්චර පිරිමි ළමයි යාළුවො ඉදලත් කොල්ලෙක් යාළුකරගන්න බැරි වුනා "නේදැයි විටෙක ඇගේ මව පවසන්නේ ඇගේ හොද වයසද පහුවී යන බැවිනි.  ඇගේ මවට ඇය ගෙන දෙන්නේ විශාල වේදනාවක් බව ඇය දන්නා මුත් ඇය එයට කුමක් කරන්නදැයි ඇය තියා දෙවියොවත් නොදනී.

පිරිමි යහළුවන් බොහෝ වුවත් සෙනෙහසින් ඇයව ලගට ගෙන ජීවිත කාලය පුරා ඇයව බලා ගන්නෙමියි සමථ වන කෙනෙක් ඇයට හමුවී නොමැත. එහෙත් මිතුරන් ලෙස වටිනා කිහිපදෙනෙක් ඈ වටේ සිටියි. එය ඇයට කදිම ශක්තියකි.

හිත නිවනා ඇගේ කටහඩත් .සිත් බදිනා ඇගේ මද සිනාවත් කෙනෙක්ගේ දෝමනස්ස නිවන අපූරු ඔසුවකි. ඇගේ ලස්සන දෑසත් රවුම් මුහුණත්  ඇයව ලෙහෙසියෙන් ඔබගේ මතකයේ රදවනු නොඅනුමානය...........

මම
ඈ තුල මා සොයනා 

~ වත් ~

වීරයා

ස්ථානය : ඉරාකයේ නගරයක්

වේලාව : තවත් එක් උදෑසනක්

ඉරාකයේ එක් නගරයක කැඩී බිදී ගිය ‍ගොඩනැගිලි සුන්බුන් අතර සැරිසරන දැරියක් සහ සුන්බුන් වූ ගොඩනැගිල්ලකට පිට දී මදක් ගිමන් හරිමින් සිටින ඇමරිකන් යුධ සෙබලෙක්.

මගේ ඇසින් ඔහු :දයාබර බිරිද ,දගකාර දියණිය සමග අතීතමතක ලොවේ සැරිසරණ දයාබර පියෙක්

මගේ ඇසින් ඇය : පිපෙන්න වෙර දරන තනිවූ දැරියක්

දැරිය  : ආමි අන්කල් ....  ඔබට සුභ දවසක්.

සොල්දාදුවා : ඔවු පුතා ... අද නම් ටිකක් නිස්කලංක දවසක් වෙයි වගේ.

දැරිය     :  ආමි අන්කල්ගෙ ගෙවල් ගොඩක් දුරද තියෙන්නෙ ?

සොල්දාදුවා : ඔව් පුතා ... මගේ රට ඇමරිකාව ... මෙහෙන් ගොඩක් දුර.

දැරිය : ඉතින් අන්කල් ඇයි ඔයා අපේ රටට ඇවිත් යුද්ධ කරන්නෙ. ඒ රටේ යුද්ධ නැතිද?

සොල්දාදුවා : නැහැ පුතා..... මේක මගේ රස්සාව... මම පුතාලගෙ රටට ඇවිත් යුද්ධ කරේ නැත්තම් ., මගේ   බිරිද .. මගේ දරුවො ජීවත් වෙන්නෙ කොහොමද.. එයාලට කන්න බොන්න අදින්න .උගන්නන්න තමයි මම මේ රස්සාව කරන්නෙ.

දැරිය : අන්කල් .. ඔයාටත් දූලා පුතාලා ඉන්නව ද? මගේ පවුලෙ ඔක්කම අය ෂෙල් වෙඩිල්ලකට අහුවෙලා මුරුණා. දැන් ඉන්නෙ මම විතරයි

සොල්දාදුවා   :   මට සමාවෙන්න පුතා ...... මට ඉන්නව පුතා වගේම ලස්සන  දෝණි කෙනෙක් . හැබැයි එයා  ඔයාට වඩා සුදුයි.

දැරිය : මගේ තාත්තාත් අන්කල් වගේමයි. ඒත් අන්කල්ට වඩා කළුයි.

          අන්කල් කවද ද දූ බලන්න යන්න නේ.?

සොල්දාදුවා : දන්නෙ නැහැ පුතා... සමහර විට මට කවදාවත්  මගේ දෝණිවත් ඇයවත් දකින්න බැරි වේවි.

දැරිය : එතකොට අන්කල් ... ඔයා වීරයෙක් ද?

සොල්දාදුවා  :  !!!!!!! !! මගේ දරුපවුල රකින්න... දුගෙ රටට ඇවිත් .. දූගේ තාත්තාව .. දූගෙ පවුලම නැති කරපු මම වීරයෙක් කියල මගේ දූ හිතාවි ද .....

මම

සුන්බුන් අතර ජීවිතය සොයන්න වෙර දරන

--  වත් --

සිත නැලැවූ .... සුරංගනා කතා ....(තාමත් සපත්තුව සොයන සින්ඩරෙල්ලා)

හා ..හා ... මම කියන්න හදන්නෙ මේ දවස් වල ශ්‍රී ලංකාවේ ගමක් ගමක් ගානේ ඇහෙන සුරංගනා කතා නෙමෙයි.

පුංචි කාළේ අපි කාගෙත් සිත් වල රජ වෙචිච, සැරිසරපු සුරංගනා කතා ගැනයි.

ඔයාලට මතකද දන්නෙ නැහැ.

•  සින්ඩරෙල්ලා  / Cinderella  
• රත හැට්ටකාරි / Little Red Riding Hood
• ගෙබි කුමාරයා
• beauty and the beast
• ඇලඩින් - මේක නම් අරාබි නිසොල්ලාසයෙ
• හිම කුමාරි /Snow White and the Seven Dwarfs
• නිදි කුමාරි  Sleeping Beauty
• Alice's Adventures in Wonderland 
• Goldilocks & three bears
• Hansel&Gretel                                                                                                                                  තව ගොඩාක්  තියනව ... ඉස්සර මම ගෙඹි කුමාරයගෙ කතාව කියවල  ගෙම්බන්ට ආදරේ කරා. දැනුත් අපේ ගෙදර මුල්ලක ඉන්නව අලිතඩි ගෙම්ඛෙක්. කොහේ ගියත් හිටිය තැනටම එනව. අම්මනම් කියන්නෙ පෙර ආත්මෙ කවුරුහරිලූ.

මගේ වයසත් එක්ක බැලුවම දැන් මගේ දරුවන්ට මම මේ කතා කියල දෙන්න ඕන. ඒත් ඉස්සරට වඩා හොදින් මේ සුරංගනා කතා දිහා දැන් මට බලන්න පුලූවන් කියල මට හිතෙනව. ඉස්සර වින්දෙ පිටතින් පෙනුන සුන්දර කතා රසයයි  නොපෙනෙන සුරංගනා ලොවයි විතරයි. ඒත් ඊට වඩා ගැඹුරක් ඒ හැම කතාවකම තියනව...

සුරංගනා කතා වල පිටත පෙනුමට වඩා දෙයක් ඇත්තටම තියනවද...

ඇයි ... Beauty & the Beast කතාවෙ මින්ස්සුන්ගෙ අභ්‍යන්තරයේ තියන සුන්දරත්ව වටහා ගන්න අපිට උගන්වනව. කාලයත් එක්ක ඒ කුමාරිට අර කැත නපුරු යක්ෂයාගේ සොදුරු යහගුණ පෙනෙනවා... ඒකයි අන්තිමට ඇයට ඔහුව කුමාරයෙක්වගේ පේන්නේ.ඒ මම කීවෙ එක කතාවක් ගැන විතරයි.

ඒත් දැනටත් මට නොතේරෙන එකම ප්‍රශ්ණය තමා සුරංගනා කතා වල ඉන්න හැම කුමාරියක්ම ඒ තරම් ලස්සන මොකද කියල....

~ මම ~
තාමත් සපත්තුව සොයන
සින්ඩරෙල්ලා

පලපුරුදු වෛදවරයෙකු වුවමනා කර තිබේ .....

දන්න දන්න අයගෙන් පොඩි උදවුවක් ඉල්ලන්නයි හදන්නෙ... මගෙ පණ වගේ තියන   කොම්පියුටරේ මුහුණත් තහඩුව දැන් ටික දවසක ඉදල හිටපු ගමන් රතු පාට වෙවී තිබ්බ. ඒ වෙලාවට පොඩ්ඩක් තට්ටුවක් දැම්මම හරිගියා.දැන් තට්ටු දැම්මට ගනන් ගන්නෙ නැහැ. දැන් එයා හදන්නෙ මට තට්ටු දාන්න වගේ....
දැන් දැන් ඒ ලෙඩෙ වැඩි වෙලා. දැන් කහ,කොළ,රතු ඔක්කොම පාට එක එක සැරේට එනව. හරියට ඡන්දෙ ඉල්ලන මහත්තරු වගේ....

අනේ මට මේ දවස්වල සෑහෙන්න සල්ලි වියදම් කරන වැඩ ගොඩාරියක් තියනව... දන්නවනෙ ලග ලගම සිංහල අවුරුද්ද එනව.ඊට පස්සෙ මැයි මාසෙ නගාගේ වෙඩින් එක. මට දන්න කෙනෙක් කියන්න මගේ මේ ICU ඉන්න  කොම්පීටර් මුහුණත් තහඩුව තව කී දවසක් වැඩ කරන්න පුලූවන් තත්ත්වෙක තියා ගන්න පුලූවන් වෙයිද...
එයාට දැන් වයස ම් ම් ම් ......... අවුරුදු 05 ක් විතර  වෙන SAMSUNG SyncMaster 591s black monitor එකක්

අද දැක්කම මට හරිම දුකයි .. එයා ඒ තරමටම පාට වෙනස් කරල... දැන් මගෙ ඇස් දෙකත් හරියට පේන්නෙ නැහැ වගේ....

පුළුවන් පිංවතෙක් ඉන්නව නම් මට Technical support  එකක් දෙනවද  ............

ලස්සන රෝස මල

මම ගැන දන්න අය කියාවි මම බොහොම අහිංසක වතුසුද්ද මලක් කියල.තවත් සමහරු කියාවි බොහොම ආඩම්බර ගාඩිනියා මලක් කියල. ලගදි ඉදල මට හිතුනා ලස්සන රෝස මලක් වෙන්න. වෙන වෙන අය ගැන හිත හිත ඉන්නෙ නැතිව දැන්වත් මම ගැන හිතන්න පටන් ගන්න ඕනි.ජීවිතේට ලං වෙන්න හදන අයට ඉඩ දීලා බලන්න ඕනි.  දුක ඈතට තල්ලු කරල දාලා සතුටින් ඉන්න රෝස මලක් වෙන්න සියල්ල සුදානම්...........

මළ ඊයෙට නොතැවෙමි

අද දින සිතුසේ ඉමී

නුපන් හෙට ගැන සිතා

තැවි තැවි දුක් නොම වෙමී

මග වරදින සමණලුන්

අතහැර ගිය ළදරුවන්

ලංකර හිත අද්දරින්  

මග පෙන්වමි  සෙනෙහසින්

සුවද සලන ජීවිතේ

සුවද විදිමි සිතුලෙසේ

සමණළියක් මෙන් රැහේ

නිබද සරමි මල් ලොව්

පිපී දිලෙන ජීවිතේ

කාලය මොහොතින් නිවේ

සුන්දර දිවි මාවතේ

යන්නෙමි පාවී මෙසේ

මම

~  රෝස මල ~

වැස්ස .....

ශ්‍රී ලංකාව හරිම ගිරිස්මයි මේ කාලේ. ආසාවට වැහි පොදක් නැහැ. ඉදල හිටල අහස කළු කරගෙන එනව.හරියට දෙගොඩතලා යන්න වහින්න වගේ ඒත් යන්තම් වැහි පොද දෙක වැටිල නවතිනව. හරියට සමහර මිනිස්සු වගේ. අපේ ගමට නම් වරුසාව නැති දවසක් තිබිඛෙ කලාතුරකින්. ඒකට හේතුව සිංහරාජ අඩවියට ලංවීමත් නිල්වලා ගග අසබඩ වීමත් වෙන්න ඇති. ඒත් දැන් අපිටත් වරුසාව නැහැ. මේ දවස්වල ශ්‍රී ලංකාවෙ මිනිස්සුන්ට තරහ යනව වැඩී.මානසික ආතතිය වැඩී . හේතුව ගිරිස්මෙ.

දිය බිදක් නැතිව තැවෙන මහපොළවත් ආදරේ නැතිව තැවෙන මිනිස්සුන්ගෙ හිතෙත් වැඩි වෙනසක් නැහැ නේද.... සමහරුන්ට නම් කෝකත් එකයි. යන්නෙ ඒසී කාර් එකේ. ඉන්නෙ ඒසී කාමරේ . බොන්නෙ කූල් වතුර.... ඒත් එයාලගෙත් සමහරුන්ගෙ හිත් වැස්ස ඉල්ලල අඩනව....
හරි හරි දැන් ඒවයින් වැඩක් නැහැ. 

මිනිස්සුන්ට ඕන මොනාද    -   වැස්ස
සතුන්ට ඕන මොනාද            -   වැස්ස
ගහකොළට ඕන මොනාද         -    වැස්ස

කාලෙකට පස්සෙ සිරි ලංකාවෙ කාටත් එකම දෙයක් ඕන වෙලා.
( එක කට්ටියකට ඇරෙන්න මොකද එයාලට ඕන කතිරෙ විතරයි......)

මේ දවස්වල මාත් ලොකු සටනක වර්ෂාව ඉල්ලල.... 

වැස්සයි ආදරෙයි සම්පුර්ණයෙන්ම එක වගේ කියල හිතෙන්නෙ මේවෙලාවට තමයි.

මහපොළවට වැස්සත්... මිනිස් සිතට ආදරයත් අරන්
ආදර වැස්සක් වෙලා... හිත් පිරෙන්න, ගංගා වැව් දෝරෙ ගලන්න.
වැස්ස වලාහක දෙවියනේ ඉන්න තැනකින් හනික එන්න.

ආදර වැස්සෙ තෙමි තෙමි නටන්න, මායි මගෙ යාළුවොයි මග බලාගෙන ඉන්නව.

~ වත් ~

ගගේ ගිය මව් සෙනෙහස

අමිල සදරුවන් පුංචි පුතා....  ඒ කවුද කියල ඔයාල දන්නව ඇති නේද.... හිත්පිත් නැති අම්ම කෙනෙක් කළු ගගට  විසිකරල දැම්ම දරු සෙනෙහසට හිමිනම තමයි ඒ.....

මේ වගේ අම්මල ඉන්නවද.... වැරුද්ද කාගෙද.... මේ දවස්වල ලොකු කතිකාවතක් යනව ඒ ගැන.

මම නම් අහන්නෙ දරුවන්ව ඔය තරම්ම වදයක් නම් ඇයි දරුවන්ව හදන්නෙ..මෙලොවට බිහිකරන්නෙ ඇයි... ආසාවල් පසුපස යන මිනිස්සුන්ට ඒව සංසිදවගන්න ඕන තරම් ක්‍රම සහ විධි මේ දියුණු ලෝකෙ තියන එකේ මොකටද දරුවන් හදල ගංගාවල් වලට බිලිදෙන්නෙ....

ආර්ථීක ප්‍රශ්න නැත්තෙ කාටද .. අපිව අපේ අම්මල හැදුවෙත් සුරසැප දීල මල් වගේ නෙමෙයි... මාතර ඉන්න හිගන පවුලක් මම දැකල තියනව. අන්තිම හිගන්නු... ඒත් දුවිල් වලින් වැහිල ගිය ලස්සන මල් පැටවු දෙන්නෙක් එක්ක තමයි ඉන්නෙ.... දරුවො හැදුවනම් වගකීමක් තියනව උන්ගැන බලන්න. නැත්තම් අර මම කලින් කීව වගේ කරන්න ඔිනි.... මට නම් දැන් හොදටම තරහයි... මුකුත් ලියන්න බැහැ... මට කියන්න තියන්නෙ ..අයදින්න තියෙන්නෙ එක දෙයයි...

පුංචි පුතේ......

මනුස්සයන් නැති මේ මිනිස්ලොව දකින්න කැමති නැති නිසාද ඇස් අරින්නෙ නැතිව ඉන්නෙ...

එහෙම හිතන්න එපා පුංචි පුතේ....

තවමත් මනුස්සකම රැදිල තියන මනුස්සකමේ සුවද තියන කිහිපදෙනෙකේ මේ ලෝකේ ඉන්නව....

ඔවුන් ඇස් දල්වන් බලන් ඉන්නෙ පුංචි පුතා ඇස් අරිනකම්....

ඉතින් මගේ පුංචි පුතේ ලේ කිරි කරන්න බැරිව දුකින් තැවෙන අම්මලාට ලේ කිරි වෙන්නත්... උනපුකිරි ටික දෙන්නෙ නැතිව සෙනෙහස ගගේ පා කර හරින අම්මලාගේ හිත් වල පිරුණ අමනුස්සකම් දුරුකරන්නත්... පුතාව බේරගත්ත අර රත්තරන් මාමලාගේ මනුස්සකමේ සුවද විදින්නත් විගහින් ඇස් ඇරපන් මයෙ පුතේ....

අම්මා නුඹ කොහේ ගියා
කිරි එරවන් එන්න ගියා
කිරි මුට්ටිය බිදී ගියා 
පුංචි පුතා ගගේ ගියා

~ වත් ~

රැකවරණය

පෙන්ටගනයටත් වඩා ආරක්ෂාව තියන තැනක්

හීතලම හීතල හිම පිරුණ ඇන්ටාටිකාවෙ වුනත්

උණුසුම්ව ඉන්න පුළුවන් තැනක්

මහමෙරක් තරම් දුක පුළුන් රොදක් වගේ

සැහැල්ලු කරන තැනක්

ලෝකෙ ඉන්න ලොකුම මංකොල්ලකාරයා ආවත්

හොරා ගන්න බැරි තැනක්

වචන සිය දහස් ගාණකින් කියන්න බැරි දේවල්

කණ තියල තප්පරකින් අහන්න පුලුවන් තැනක්

ලෝකෙ තියන ඔක්කම ආදරේ එකතු කරල

එකට ගුලිකරපු තැනක්

දන්නවද ඒ කොහෙද කියල

ඒ තමයි මගේ තාත්තාගෙ පපු කුහරය

අන්තිමට ලොකේ තිබිබ ලොකුම න්‍යෂ්ඨික බෝම්බය

පිපිරුව තරමේ දුකක් ඉතිරි කරල

යන්නම යන්න ගියා

එදා ඉදල මම තවමත් ඒ උණුසුම රැකවරණය සොයනව

අනේ මගේ රත්තරන් තාත්තා

මතු උපදින හැම ආත්මයකම මගේම තාත්තා වෙලා 

මා ලගින්ම ඉන්න .....

- වත් - 

ආදරේ විසිකරමි මා

ජීවිතේ කවියක්
සිතුවමක් ගීතයක්
අතීතයෙ සිතුනමුත් වැරදුනා පැරදුනා  මා

දකින දේ මිරිගුවක්
ඇසෙන දේ හිතලුවක්
නෙත් පියන් තෙත් කරන්  කළුවරේ සිනසුනා මා

ලැඛෙන දේ හීනයක්
ලැබුන දේ  සෝකයක්
අහුල ගත් ගීතයෙත් පද පේළි හිස් කරා මා

ගිනි  ගොඩේ ඇවිදයමි
කළුවරින් එළිය වෙමි
දිරිය ගෙන බොරු කියන් ආදරේ විසිකරමි මා

ආදරේ විසිකරන
මම
෴ වත් ෴

.......... මගේ හාදුව .................

 

දෙන්නාටද ලැඛෙන
ලබන්නාටද ලැඛෙන
පියවුණූ  නෙතු අද්දර 

දකින
ආදරයේ සොදුරු නිමේෂය
 මා පෙරුම් පුරනා අන්සතු වූ මගේ හාදුව
අනේ එක හාදුවක්
එකම එක හාදුවක් විතරයි
වෙන මුකුත් මට එපා
ජීවත් වෙන්න වැඩිත් එක්ක ඇති

     
හාදුව හොයන
මම
෴ වත් ෴

හිමි අහිමි

 

ඊයේ මා ළගයි අද නුඹ කොතනකදෝ
සුවදත් අරන් නුඹ කොතනක සැගවුනිදෝ
හදවත පාරනා ගැහටක් සිදුවුනි දෝ
වෙන්ව වෙසෙන්නට රහසින් සැරසුනිදෝ

මගෙ ආදරේ කඩතොළු තැන් තිබේ ද
රහසින් හෝ වරදේ මම බැදේ ද
කිරි සුවඳක අඩුපාඩුව දැනේ ද
මා තනි කළත් හිමියනි ඔබ සුවෙන් ද

හෙට දිනයේ රන් අරුණළු වැටෙන විට
විහග කුරුළු ගී වැල් පද බැදෙන විට
සිහින් සරින් මුමුණා මා සවන් වෙත
ලගින් සිටිනු මැන මා නෙතු අරින විට

හිමි අහිමි 

මම

෴ වත් ෴